Azıada ánuranyna laıyqty delingen 10 án belgili boldy
ALMATY. Qazannyń 27-si. QazAqparat /Erbol Turymbetov/ - Búgin Almatyda VII qysqy Azııa oıyndarynyń ánuranyna jarııalanǵan baıqaý nátıjeleri belgili boldy. Іrikteý barysynda úzdik dep tanylǵan 10 ánniń ishinen Azıada ánurany anyqtalatyn bolady.
Baıqaýdy ótkizýge Astana men Almaty qalalary ákimdikteri, GSM Qazaqstan/Kcell uıaly baılanys operatory, «Qazaqstan» RTRK men «Mıras sport» qoǵamdyq qory qoldaý kórsetti.
Birinshi kezeńde baıqaýdy uıymdastyrý komıtetine 105 án kelip túsken. Olardyń ishinde 49-ynyń mátini qazaq, 45-i orys jáne 11-i qazaq, orys, aǵylshyn tilderinde jazylǵan. Baıqaýǵa qatysýshylardyń ishindegi eń jasy úlkeni - 72 jastaǵy zeınetker, al eń kishisi 17 jasar Shymkent qalasynyń oqýshysy boldy.
«Baıqaýǵa usynylǵan jumystar tek Qazaqstannan ǵana emes, Avstrııadan da keldi. Ár jumysty alqa músheleri jeke-jeke qarady. Bir qorytyndyǵa kelý úshin birneshe ret jınalyp, talqyladyq. Ánurannyń sapasy men mándiligine baılanysty aıtys-tartystar kóp boldy. Sondyqtan qorytyndy jasaý ýaqytyn sozýǵa týra keldi», - dedi «2011 jylǵy VII qysqy Azııa oıyndaryn uıymdastyrý komıtetiniń atqarýshy dırektsııasy» AQ marketıng, aqparattyq jáne ımıdjdik qoldaý departamentiniń dırektory Nurlan Nurǵazın.
Qazylar alqasy konkýrstyń 10 úzdik jumysyn ekinshi kezeńge ótkizdi. Olardyń qataryna QR halyq ártisiE. Hasanǵalıevtiń «Azıada alaýy», QR eńbek sińirgen ártisi K. Dúısekeevtiń «Azıada Qazaqstan», N. Teńizbaevtyń «Qazaqstan», B. Qusaıynovtyń «El namysy», «Mıstıerıons» tobynyń «Azıada», M. Jáýtikovtiń «Sport», E. Álekeevtiń «Alǵa, Qazaqstan», D. Syzdyqovtyń «Azıada alaýy», I. Breýsovtyń «Azıada» jáne E. Shákeevtiń «Azıada» ánderi kirip otyr. Bul úzdik jumystar ishinen naǵyz ánuranǵa laıyq ándi halyq Kcell kompanııasy usynǵan 1212 nómirine «sms» daýys berý arqyly tańdaıtyn bolady. Al tańdaýǵa usynylatyn ánder «NS», «Qazaq radıosy» jáne «Sálem» radıolarynyń efırinen erteńnen bastap berile bastaıdy. Daýys berý qorytyndysy 1-shi jeltoqsan kúni belgili bolady.
