Azıada alaýyn asqaq sezimmen alyp júrdim - alaýger Jandos Baıdilda
ALMATY. 12 qańtar. QazAqparat /Erbol Turymbetov/ - Elimniń bıik bedeliniń belgisine aınalǵan Azıadanyń alaýyn asqaq sezimmen alyp júrdim.
Búgin Almatyda ótken Aq Azıada alaýy estafetasyna qatysyp, alaý qutysyn alyp júrgen «Almaty aqshamy» gazetiniń tilshisi Jandos Baıdilda QazAqparat tilshisine bergen suhbatynda osylaı aıtty.
36 nómirli alaýger bolǵan J. Baıdilda óz qýanyshymen bólisti. «Estafeta barysynda Olımpıada chempıondary Jaqsylyq Úshkempirov pen Olga Shıshıgına jáne taǵy basqa qoǵamǵa tanymal adamdarmen birge boldym. Men alaý qutysyn QR Parlamenti Májilisiniń depýtaty Ǵanı Qasymovtan keıin ardager sport jýrnalısi Dıas Omarovtan qabyldap, Sátbaev kóshesiniń boıymen 150 metr alyp júrdim. Alaý qutysy qolyma tıgende elimniń bıik bedeline kýá bolǵandaı boıymdy asqaq sezim bıledi», - deıdi ol.
Almatydaǵy halyqaralyq shańǵymen tuǵyrdan sekirý kesheninde bastalǵan alaý estafetasy ál-Farabı dańǵyly boıymen Fýrmanov, Sátbaev, Baıtursynov kóshelerinde jalǵasty. Odan soń, Abaı dańǵyly arqyly Dostyq, Shevchenko, Qonaev, Qabanbaı batyr, Abylaıhan dańǵyldaryn basyp ótip, «Astana» alańynda aıaqtaldy.
«Tarıh sahnasynda ózindik oryn alar álemdik sharanyń ótýine osylaı atsalysyp jatqanyma óte qýanyshtymyn. Endi az ýaqytta Aq Azıada oıyndary da bastalǵaly tur. Álem kóz tiger qurlyqtyń aıtýly dodasynda el sportshylarynyń bıik tuǵyrdan kórinýlerin tileımin», - deıdi Jandos Baıdilda.
