Azıada alaýy Pavlodarǵa jetkizildi
PAVLODAR. 24 qańtar. QazAqparat /Vera Lıvıntsova/ - Keshe, 23 qańtar kúni Aqmola oblysynan Pavlodarǵa jetkizilgen Azıada alaýy saltanatty jaǵdaıda kútip alyndy.
Alaý estafetasy dırektsııasynyń úılestirý ortalyǵynyń jetekshisi Sársen Quranbek pen Azıada alaýyn alyp júrgen delegatsııa músheleri Pavlodar aerovokzalynda jýrnalısterdiń saýaldaryna jaýap berdi. Pavlodar ákimi Baqytjan Jolamanov jınalǵan qaýymǵa oblys ortalyǵyndaǵy sporttyń damý úrdisi týraly áńgimelep berdi. Ótken jyly Pavlodarda 12 sport nysany - boks jáne úlken tennıs ortalyqtary, mını-fýtbol, tennıs, voleıbol, basketbol alańdary bar sporttyq keshender salynǵan. Shańǵy trassalary bar «Jasyl orman» bazasy da damyp keledi.
Azıada alaýy «Qazaqstannyń Halyq banki» aktsıonerlik qoǵamynyń Pavlodar oblystyq fılıalyna saqtaýǵa qoıyldy. Búgin túste oblys ortalyǵynda Azıada alaýynan shyraq jaǵylady. Oblystyń úzdik 60 ókili, olardyń qatarynda sportshylar men qoǵam qaıratkerleri bar, Alaý estafetasyn Pavlodardyń negizgi kóshelerimen alyp ótedi.
