Azıada alaýy Oralǵa keldi
ORAL. 18 qańtar. QazAqparat /Eljan Eraly/ - 17 qańtar kúni keshkisin Azıada alaýy arnaıy ushaqpen Oral qalasyna jetkizildi.
Atyraýdan ákelingen alaýdy jetinshi bolyp qarsylaý baqyty buıyrǵan shahardyń búkil sportsúıer qaýymy osy kúni áýejaıdan tabyldy. Jeti - qazaqta qasıetti san, sondyqtan Astana men Almatyda ótetin Azıadada batysqazaqstandyqtardyń aıy ońynan týatyn shyǵar dep joramaldap jatty jıylǵandar.
QR Tótenshe jaǵdaılar mınıstrliginiń ushaǵy Oral áýejaıyna kelip qonǵannan keıin Azıada shyraǵy salynǵan quty qyraǵy kúzetshilerdiń qadaǵalaýymen áýejaıdyń ekinshi qabatynda jýrnalıster men jankúıerlerdiń nazaryna usynyldy. Osy jerde jýrnalısterge brıfıng ótkizildi. Brıfıngke Alaý estafetasy dırektsııasy basshysynyń orynbasary Sársen Quranbek, oblys ákiminiń orynbasary Tımýr Shákimov, qala ákimi Samıǵolla Orazov, oblystyq týrızm, dene shynyqtyrý jáne sport basqarmasynyń bastyǵy Músilim Ońdaǵanov, demeýshiler - «Mıtsýbıshı motors» kompanııasynyń ókili Sergeı Kovalenko, «Qazaqstan halyq banki» AQ BQO fılıalynyń dırektory Vıtalıı Grıdınder qatysty.
Saltanatty sharada aldymen sóz alǵan oblys ákiminiń orynbasary Tımýr Shákimov Alaý estafetasyn uıymdastyryp, ótkizýdiń mańyzyna erekshe toqtaldy. «Eýropa men Azııanyń kindiginde oryn tepken Oral shaharyna qosh keldińizder! El Kýveıtte janǵan qasıetti Alaý, mine, bizge de jetip otyr. Astana men Almatydaǵy kezekti qysqy Azııa oıyndarynyń ashylýyna da sanaýly kúnder qaldy. Bul tek sporttyq emes, sonymen qatar Elbasynyń halyqaralyq arenadaǵy aıryqsha bedelin anyq kórsetetin bastama boldy. Osy úlken jarysta jerlesterimizdiń de aıbyny asqaq bolady dep senemin», - dedi Tımýr Ádıetuly.
Kelesi kezekte jýrnalıster saýaldaryna jaýap bergen Alaý estafetasy dırektsııasy basshysynyń orynbasary Sársen Quranbek te Azıadanyń Qazaqstanda ótýine Prezıdentimiz Nursultan Nazarbaevtyń qosqan úlesi ólsheýsiz ekendigin qadap aıtty.
-Qazaqstanda buryn-sońdy mundaı mańyzdy ári mártebeli sporttyq shara bolǵan emes. Azıada el Táýelsizdiginiń 20 jyldyǵymen de tuspa-tus kelip otyr. Alaý estafetasy da oıyndar tarıhynda tuńǵysh ret uıymdastyryldy. Olaı bolsa, múmkindikti paıdalanyp, osynaý jahandyq jarysty ótkizýge kúsh-jigerin aıamaǵan Elbasymyzdyń eseli eńbegin atap ótkenimiz jón. Estafeta barlyq qalada tamasha ótýde, eshqandaı oqys oqıǵalar bolǵan joq. Bolmaıdy dep senemiz. Búgin tańda Astana men Almatydaǵy barlyq sporttyq nysandar Azıadaǵa júz paıyz daıyn, - dedi Sársen Quranbek.
Alaý estafetasy búgin qala kóshelerinde jalǵasyp, keshkisin Azıada shyraǵy arnaıy ushaqpen Aqtóbege sapar shekpek.
