Azıada alaýy morjdarmen birge Astanadaǵy Esil ózenine tústi

Búgin saǵat 15.30-da Astana ákimdigi ǵımaratynyń aldyndaǵy alańnan Azııa alaýy estafetasynyń ekinshi kezeńi bastaldy. Estafetanyń ekinshi baǵyty ózindik erekshelikterge toly boldy. Alaýdy birinshi bolyp ákimdik ǵımaraty aldyndaǵy muz aıdynymen shaıbaly hokkeı boıynsha QR sport sheberi Talǵat Jaılaýov alyp ótti. Odan keıin alaý qutysyn mototsıklmen baıker Dmıtrıı Petrýhın, konkımen Esil ózeniniń ústimen konkımen júgirý sporty boıynsha QR memlekettik jattyqtyrýshysy, halyqaralyq dárejedegi sport sheberi Radık Bıkshentaev alyp júrdi.

Al, QR Tótenshe jaǵdaılar mınıstrligi sýdan qutqarý qyzmetiniń qutqarýshysy, morjdar klýbynyń ókili Seıilbek Nákipov Azııada otyn óz shákirtterimen birge Esil ózenine túsirdi. Morjdar 20 gradýstyq aıazda alaýmen birge 10 metr júzip ótti.

Estafeta «Han Shatyr» saýda, oıyn-saýyq ortalyǵynda aıaqtaldy. Osy ortalyqta estradalyq juldyzdar men shyǵarmashylyq toptardyń qatysýymen úlken gala-kontsert ótti.

Aıta keteıik, birer sátterden keıin «Astana-Arena» stadıonynda VІІ-shi Qysqy Azııa oıyndarynyń saltanatty ashylýy bastalady. Saltanatty rásimniń aıaqtalýyna qaraı alaý «Han Shatyrdan» «Astana-Arena» stadıonyna jetkiziledi. Basty alaý tutatylǵannan keıin Qazaqstandaǵy Azııa oıyndary resmı túrde bastalady.

Aıta keteıik, bas alaýdy tutatý qurmeti kimge berilgendigi osy ýaqytqa deıin áli qupııa ustalynýda.