Azıada Alaý estafetasynyń 80 alaýgeri sertıfıkatqa ıe boldy
ALMATY. 27 qańtar. QazAqparat /Ádilet Musahaev/ - «Mádenı Azıada» aıasynda Almatyda 9 shara ótedi, oǵan qysqy Azııa oıyndarynyń jabylýy da kiredi, sizderdi osyndaı mádenı sharalarǵa atsalysýlaryńyzdy suraımyn. Bul jaıynda búgin Almaty qalasy ákiminiń orynbasary Serik Seıdýmanov Azıada Alaý estafetasynda alaýger atanǵandarǵa sertıfıkat tapsyrý kezinde aıtty.
S.Seıdýmanovtyń aıtýynsha, 28 qańtardan bastap 6 aqpan aralyǵyndaǵy «Mádenı Azıada» sharalary barysynda «Astana» alańynda jáne «Qar barysy saıabaǵynda» túrli kontsertter men mapping-shoý ótedi. «Al Azıada oıyndarynyń jabylýy 6 aqpan kúni saǵat 17:00-de B.Sholaq atyndaǵy sport saraıynda ótedi, sol ýaqytta halyqaralyq tuǵyrdan shańǵymen sekirý sport kesheninde barlyq eriktilerdi jınap alǵysymyzdy bildirip, otshashý uıymdastyramyz», - deıdi ol.
Sonymen qatar ol ótkeli otyrǵan jarystyń eki ereksheligi bar ekendigin aıtyp ótti. "Birinshiden, bıylǵy qysqy Azııa oıyndarynda tuńǵysh ret Alaý estafetasy ótse, ekinshiden jarys elimizdiń eki iri qalasynda ótpek", - dep atap ótti óz sózinde ol.
S.Seıdýmanov, qala syrttan keletin qonaqtardy qarsy alyp, olarǵa joǵary deńgeıde qyzmet kórsetýge ázir ekendigin jetkizdi. "Qaladaǵy 18 qonaqúı, temirjol vokzaly, áýejaı jáne taǵy basqa qyzmet oryndary qalypty jaǵdaıda jumys istep jatyr. Keshe ǵana aqparat taratatyn halyqaralyq baspasóz ortalyǵy ashyldy. Onda BAQ ókilderine aqparat berýdiń barlyq jaǵdaıy jasalǵan.", - deıdi S.Seıdýmanov.
Sondaı-aq ol Almaty boıynsha ótken estafetedaǵy alaýgerlerdiń 30-y Astanadaǵy 7-Qysqy Azııa oıyndarynyń ashylýyna joldama alatyndyǵyn jetkizdi.
