Azıada: 29 qyrkúıekte Qazaqstan quramasy bir kúmis, úsh qola medal enshiledi

Týrızm jáne sport mınıstri Ermek Marjyqpaev Azııa oıyndarynda Qazaqstan komandasy 29 qyrkúıek kúni bir kúmis jáne úsh qola medal jeńip alǵanyn málimdedi, dep habarlaıdy QazAqparat.

"Sapynda Rýslan Qurbanov, Elmır Álimjanov, Erlik Sertaı, Vadım Sharlaımov bar semserlesýden Qazaqstannyń erler quramasy Azıadanyń kúmis medalin jeńip aldy. Fınalda bizdiń sportshylar Japonııanyń komandasynan (35:36) jeńilip qaldy.
Velotrekten Qazaqstan erler quramasy (Ramıs Dinmuhamedov pen Artem Zaharov) medıson baǵdarlamasynyń fınalynda 37 upaı jınap, 3-shi orynǵa ıe boldy", - degen mınıstr.

1: 52: 25 ýaqyt aralyǵynda úsh kezeńnen ótken Aıan Beısenbaev trıatlonnan qola medal jeńip aldy.

Jeńil atletıkadan elimizdiń qorjynyna alǵashqy júldeni Karolın Chepkoech Kıpkırýı saldy. 10 shaqyrymdyq jarysta ol úshinshi keldi.

"Shahmattan áıelder quramasy birinshi týrda BAÁ komandasyn 4:0 esebimen jeńdi, erler quramasy Taılandtan 3,5:0,5 esebimen ozyq shyqty.

Sý dobynan Qazaqstan áıelder quramasy Azıadadaǵy 4-shi matchta Taıland komandasyn 13:8 esebimen jeńdi.

Hokkeıden Qazaqstannyń áıelder komandasy Indonezııadan kelgen qarsylastaryn 2:1 esebimen jeńdi", - delingen Ermek Marjyqpaevtyń jazbasynda.

92 kelige deıingi salmaqta óner kórsetken boksshy Saǵyndyq Toǵaıbaı Irannan kelgen qarsylasyn merziminen buryn jeńip, Azııa oıyndarynyń jartylaı fınalyna shyqty. Al Karına Ibragımova (57 kg) Soltústik Koreıadan kelgen sportshyny jeńdi.

6-shy jarys kúniniń qorytyndysy boıynsha Qazaqstan quramasynyń qorjynynda 3 altyn, 4 kúmis jáne 19 qola júlde bar.