Azıada-2026: Rınata Sultanova jarys jolyndaǵy qıyndyqtardy aıtty
SINSIRO. KAZINFORM — Qazaqstandyq velosportshy Rınata Sultanova Japonııadaǵy HH jazǵy Azııa oıyndaryndaǵy jeńisinen keıingi áserimen bólisti.
Sportshy Kazinform tilshisine eksklıýzıvti suhbat berip, barsha qazaqstandyqtarǵa sálem joldady.
- Maǵan jankúıer bolǵandardyń barlyǵyna zor alǵys aıtamyn. Osynda bolǵanyma jáne elim men otbasym úshin osy altyn medaldi jeńip alǵanyma óte qýanyshtymyn,- dedi Rınata.
Sondaı-aq, otandasymyz jeńis jolynda qandaı qıyndyqtardy baǵyndyrǵanyn aıtty.
- Búgin bári oıdaǵydaı boldy. Jarys trassasy kúrdeli: munda tómen túsýler men joǵary órleýler, sondaı-aq baǵyt pen berilisti jıi ózgertý qajettiligi bar, sondyqtan bul tehnıkalyq kúrdeli jarys joly sanalady. Aýa raıy tamasha boldy. Jańbyr jaýady dep boljanǵan edi, biraq biz odan aman qaldyq,- dedi sportshy.
Aıta keterligi, QR týrızm jáne sport mınıstri Erbol Myrzabosynov jarys alańyna arnaıy kelip, Rınata Sultanovany jeńisimen quttyqtady.
Osyǵan deıin habarlaǵanymyzdaı, Rınata Sultanova áıelder arasynda tasjoldaǵy velosportta 36 mınýt 23.72 sekýnd nátıje kórsetip, máre syzyǵyn birinshi bolyp kesti.
Sonymen qatar, Arlan Jańabaı trıatlonan Azııa oıyndarynyń qola júldegeri atandy.
