Azıada-2026: Qazaqstan quramasynyń qorjyny tórt júldemen tolyqty
NAGOıA. KAZINFORM — Japonııanyń Aıchı prefektýrasy men Nagoıa qalasynda ótip jatqan HH jazǵy Azııa oıyndarynyń úshinshi jarys kúni óz máresine jetti.
Qazaqstandyq sportshylar búgin 17 sport túrinen jarys jolyna shyǵyp, el qorjynyna eki altyn jáne eki qola medal syılady.
Eń áýeli karateden kýmıte baǵdarlamasy -55 kg deıingi salmaqta Bella Samasheva qola medal jeńip aldy.
Jaǵajaı voleıbolynan Qazaqstan ulttyq quramasynyń ókilderi Sergeı Bogatý men Kırıll Gýrın toptyq kezeńniń kezekti kezdesýinde jeńiske jetti.
Sonymen qatar, basketboldan Qazaqstan áıelder quramasy toptyq kezeńdegi alǵashqy oıynda Gonkong quramasyn 80:77 esebimen qapy qaldyrdy.
Erkinǵalı Búrkitalın erler arasynda (77kg) aralas jepe-jek sportynan dástúrli stıl boıynsha jarys jolyna shyǵyp, aqtyq synda Bahreın sportshysy Muhammed Nabıevti 3:0 esebimen jeńdi.
Aıta keterligi, bul Qazaqstan quramasynyń osy Azııa oıyndaryndaǵy besinshi altyn júldesi boldy.
Qazaqstan áıelder quramasy sý dobynan úshinshi kezdesýinde Taıland quramasyn 14:13 esebimen jeńdi. Oǵan deıin el quramasy Sıngapýrdy 12:7 esebimen qapy qaldyryp, Japonııaǵa 10:25 esebimen jol bergen edi.
Endi otandastarymyz 23 qyrkúıekte Qytaı, 24 qyrkúıekte Ózbekstan quramalarymen sheberlik baıqasady.
Qadyrbek Shynbaev aralas jekpe-jek sortynan erler arasynda (71kg) zamanaýı stılde aqtyq synda Tájikstan ókili Hýrshedzoda Behrýzden 3:0 esebimen basym túsip, el qorjynyna altynshy altyn medal syılady.
Karateden Kýmıte baǵdarlamasynda -75 kg salmaqta el namysyn álem chempıonatynyń júldegeri, 3 dúrkin Azııa chempıony Nurqanat Ájiqanov qorǵady. Ol shırek fınalda ırandyq Morteza Nematımen kezdesip, jol berdi. Qola medal úshin jekpe-jekte otandasymyz fılıppındik Batıkan Alvındi 10:1 esebimen oısyrata jeńdi.
Úshinshi jarys kúniniń qorytyndysy boıynsha, 34 eldiń sportshylary júlde jeńip aldy. Qytaı quramasy 32 altyn, 13 kúmis jáne 8 qola medalmen kósh basynda. Al Japonııa (11 altyn, 16 kúmis, 19 qola) jáne Ońtústik Koreıa (6 altyn, 4 kúmis, 17 qola) aldyńǵy úshtikten kórindi.
Qazaqstan quramasy qazirgi ýaqytta 6 altyn, 1 kúmis jáne 5 qola medalmen jalpy esepte tórtinshi orynda kele jatyr.
Osyǵan deıin Erkinǵalı Búrkitalın Kazinform tilshisine shaǵyn suhbat berip, jarystan keıingi sezimi jáne aldaǵy kásipqoı mansaby týraly aıtyp berdi.
