Azıada-2026: Qazaqstan quramasy jetinshi jarys kúninde bes qola medal jeńip aldy

Qazaqstan qorjynyna eskek esýden birden úsh júlde tústi. Stella Sýhanova birlik-baıdarkamen 500 metr qashyqtyqqa jarystyń fınalynda úshinshi oryn aldy. Qazaqstandyq sportshy qashyqtyqty 1 mınýt 59,688 sekýndta baǵyndyrdy. Bul – Sýhanovanyń osy Azıadadaǵy ekinshi qola medali. Buǵan deıin ol tórttiktiń quramynda úshinshi oryn alǵan bolatyn.

Erler arasynda dál osy qashyqtyqtaǵy fınalda Dmıtrıı Holmogorov qola júldeger atandy. Qazaqstandyq eskekshi 1 mınýt 44,453 sekýnd ýaqyt nátıjesin kórsetip, Ózbekstan ókili Shahrıer Mahkamov pen Ońtústik Koreıa sportshysy Djan San Vonnan artta qaldy.

Eskek esýden taǵy bir qolany Sergeı Emelıanov pen Rýfına Iskakova jeńip aldy. Olar aralas ekilik-kanoemen 500 metrge jarystyń fınalynda 1:51.124 ýaqyt nátıjesin kórsetip, úshinshi orynǵa ıe boldy. Altyn medal Qytaıǵa, kúmis júlde Ózbekstanǵa buıyrdy.

Nysana kózdeýden Qazaqstan áıelder quramasy 50 metr qashyqtyqtan myltyqpen úsh qalypta atý boıynsha komandalyq esepte úshinshi oryn aldy. Arına Malınovskaıa, Sofııa Shýljenko jáne Elızaveta Bezrýkova jalpy 1754 upaı jınady. Altyn medaldi Qytaı, kúmisti Úndistan quramasy ıelendi. Sonymen qatar Malınovskaıa jekeleı saıystyń fınalyna joldama alyp, altynshy orynǵa turaqtady.

Qazaqstan quramasynyń qorjynyna besinshi medaldi sablıa básekesinde óner kórsetken erler komandasy saldy. Nazarbaı Sattarhan, Artem Sarkısıan, Qýanysh Erǵashbaı jáne Nurmuhammed Jaılybaı shırek fınalda Qytaı quramasyn 45:40 esebimen jeńdi. Jartylaı fınalda qazaqstandyqtar Japonııaǵa 34:45 esebimen jol berip, qola júldeger atandy. Artem Sarkısıan úshin bul – osy Azıadadaǵy ekinshi júlde. Ol buǵan deıin jekeleı saıysta qola medal jeńip alǵan edi.

Olga Shmeleva men Artem Tereşenko júldege bir qadam jetpeı qaldy. Aralas ekilik-baıdarkamen 500 metrge jarystyń fınalynda qazaqstandyqtar 1:41.272 ýaqyt nátıjesin kórsetip, tórtinshi oryn aldy.

Bokstan Mahmud Sabyrhan men Nurbek Oralbaı jarysty sátti bastady. 55 kelige deıingi salmaqta 1/8 fınalda Sabyrhan ırandyq Mehdı Kazemıdi jeńip, shırek fınalǵa ótti. Jekpe-jek barysynda qazaqstandyq boksshy qarsylasyn eki ret nokdaýnǵa túsirdi.

Nurbek Oralbaı 90 kelige deıingi salmaqta Aýǵanstan ókili Sılab Nýrımen kezdesip, tóreshilerdiń biraýyzdy sheshimimen 5:0 esebimen jeńiske jetti. Ol da jarysty shırek fınalda jalǵastyrady.

Vıktorııa Grafeeva jarystaǵy ónerin aıaqtady. 60 kelige deıingi salmaqtyń 1/8 fınalynda ol Qytaılyq Taıbeı ókili, Olımpıada chempıony Lın ıÝıtınge tóreshilerdiń sheshimimen 2:3 esebimen jol berdi.

Shadrak Koech erler arasyndaǵy marafonda úzdik ondyqqa endi. Qazaqstandyq jeńil atlet 2 saǵat 14 mınýt 07 sekýnd nátıje kórsetip, márege jetinshi bolyp jetti.

Aýyr atletıkadan Beksultan Aıtbaı 75 kelige deıingi salmaqta jetinshi oryn aldy. Qazaqstandyq sportshy julqa kóterýde 135 kelini, serpe kóterýde 177 kelini baǵyndyrdy. Eki saıys nátıjesi boıynsha 312 kelini eńserdi.

Jeti jarys kúniniń qorytyndysy boıynsha Qazaqstan quramasynyń enshisinde 35 medal bar: 8 altyn, 8 kúmis jáne 19 qola. Jalpykomandalyq esepte Qazaqstan besinshi orynda tur.

Aıta ketelik qazaqstandyq sportshylardyń 27 qyrkúıektegi jarys kestesi jarııalanǵan edi.