Qazaqstan sportshylary Azııa oıyndarynyń tórtinshi jarys kúninde qandaı nátıje kórsetti
NAGOıA. KAZINFORM — Japonııada ótip jatqan jazǵy Azııa oıyndarynyń tórtinshi jarys kúni óz máresine jetti.
Qazaqstandyq sportshylar búgin 18 sport túrinen jarys jolyna shyǵyp, el qorjynyna bir altyn, eki kúmis jáne eki qola medal syılady.
Eń áýeli, jeńil atlet Krıstına Morozova el namysyn qorǵap, qorjynymyzdy kúmis medalmen tolyqtyrdy.
Erler arasynda tasjoldaǵy velosporttan toptyq jarysta Alekseı Lýtsenko, Evgenıı Fedorov, Nıkolıa Vınokýrov el namysyn qorǵady. Qorytyndysynda, qazaqstandyq sportshy Alekseı Lýtsenko 13:11 mınýt nátıje kórsetip, márege birinshi bolyp jetti.
Al taǵy bir qazaqstandyq sportshy Evgenıı Fedorov 4 saǵat 15:09 mınýt nátıjemen kúmis júlde enshiledi.
Akademııalyq eskek esýden alǵashqy jarys kúninde otandastarymyz eki V fınalyna joldama aldy. Ashanbek Bapan jekeleı saıysta 7:00.52 ýaqyt kórsetkishimen segizinshi orynǵa jaıǵasyp, V fınalyna ótti. Sondaı-aq Alekseı Krasnovskıı men Vladıslav Galkın juptyq ekilikte 6:36.28 ýaqyt nátıjesimen besinshi oryn alyp, V fınalyna ótti.
Qazaqstan áıelder quramasy stend atýdan Azııa oıyndarynda kúmis júlde jeńip aldy.
Áıelder arasynda skıt baǵdarlamasy boıynsha komandalyq fınalda Zoıa Pıskýn, Ásem Orynbaı jáne Adel Sadaqbaeva el namysyn qorǵady. Qorytyndysynda, Qazaqstan komandasy 336 upaı enshilep, ekinshi orynnan kórindi.
Aıta keteıik, qazaqstandyq sportshy Roza Keńes eskek esýden jeńil salmaqtaǵy jekeleı saıysta A fınalynda óner kórsetedi. Otandasymyz irikteý kezeńinde qashyqtyqty 7:49.70 ýaqytta baǵyndyryp, besinshi orynǵa ıe boldy. Osylaısha ol irikteýden sátti ótti.
Qazaqstandyq semserlesýshi Artem Sarkısıan semserlesýden Qazaqstan qorjynyna tarıhı qola júlde syılady. Otandasymyz jekeleı synda jartylaı fınalda ońtústikkoreıalyq semserlesýshi O San Ýkke 9:15 esebimen ese jiberip, jarysty qola medalmen aıaqtady.
Ýshý sportynda 70 kelige deıingi salmaqta óner kórsetken Álıjan Ablaǵatov jartylaı fınalda ırandyq Moharramı Pıragomǵa ese jiberdi. Osylaısha, Álıjan Ablaǵatov Azııa oıyndarynyń qola júldegeri atandy. Bul — Qazaqstannyń ýshýdan Azııa oıyndaryndaǵy alǵashqy medali.
Tórtinshi jarys kúniniń qorytyndysy boıynsha, 37 eldiń sportshylary júlde jeńip aldy. Qytaı quramasy 48 altyn, 20 kúmis jáne 10 qola medalmen kósh basynda. Al Japonııa (15 altyn, 25 kúmis, 27 qola) jáne Ońtústik Koreıa (8 altyn, 8 kúmis, 25 qola) aldyńǵy úshtikten kórindi.
Qazaqstan quramasy qazirgi ýaqytta 7 altyn, 4 kúmis jáne 8 qola medalmen jalpy esepte tórtinshi orynda kele jatyr.
Osyǵan deıin habarlaǵanymyzdaı, búgin Azıadadaǵy boks básekesi bastaldy. Qazaqstan quramasynyń sportshylary 11 salmaq dárejesinde sharshy alańǵa shyǵyp, júldege talasady.
