Azıada-2026: Qazaqstan quramasy alǵashqy jarys kúni jalpy esepte tórtinshi orynda
NAGOıA.KAZINFORM — Japonııanyń Aıchı prefektýrasy men Nagoıa qalasynda ótip jatqan HH jazǵy Azııa oıyndarynyń alǵashqy jarys kúni óz máresine jetti.
Qazaqstan quramasy búgin tabysty óner kórsetip, sportshylarymyz el qorjynyna birden tórt altyn jáne eki qola medal syılady.
Eń áýeli, Qazaqstandyq trıatlonshy Arlan Jańabaı márege úshinshi bolyp jetip, alǵashqy júldege qol jetkizdik.
Jarys nátıjesi boıynsha І oryndy japondyq Takaýmı Hodjo (52:56) ıelense, ІІ oryn Qytaı sportshysy Chjan Sıýjýıǵa (53:05) buıyrdy. Al otandasymyz Arlan Janabaı 53:11 kórsetkishimen ІІІ oryn minberinen kórindi.
Osydan keıin qazaqstandyq velosportshy Rınata Sultanova áıelder arasynda jekeleı synda 36 mınýt 23.72 sekýnd nátıje kórsetip, Azıada chempıony atandy.
Aıta keterligi, bul Qazaqstan quramasynyń osy Azııa oıyndaryndaǵy alǵashqy altyn medali bolatyn.
Іle-shala jarys jolyna shyqqan Alekseı Lýtsenko erler arasynda jekeleı synda 41 mınýt 24.05 sekýnd nátıje kórsetip, máre syzyǵyn birinshi bolyp kesti.
Bul jeńisten keıin Alekseı Lýtsenko jazǵy Azııa oıyndarynda bes dúrkin chempıon atandy. Ol osyǵan deıin Inchhon (2014jyl), Djakarta (2018 jyl) jáne Hanchjoý (2023 jyl) Azııa oıyndarynda tórt altyn medal jeńip alǵan bolatyn.
Sonymen qatar Qazaqstan erler quramasy qazirgi bessaıystan qola júlde jeńip aldy.
Komandalyq esepte Qazaqstan quramasy úzdik úshtikti túıindep, Azııa oıyndarynyń qola júldesin jeńip aldy. Altyn medal Qytaı quramasyna buıyrsa, Ońtústik Koreıa ekinshi oryn aldy.
Qazaqstan quramasy karate sportynanda tabysty óner kórsetip, birden eki altyn medal enshiledi.
Qazaqstandyq karateshi Jolaman Bıǵabyl kýmıte baǵdarlamasy boıynsha 55 kelige deıingi salmaq dárejesiniń fınalynda Ózbekstan ókili H.Halımovty 9:1 esebimen qapy qaldyrdy.
Al Sofıa Berýltseva Qazaqstan qorjynyna Azıadanyń tórtinshi altynyn saldy. Otandasymyz kýmıte baǵdarlamasy boıynsha 68 keliden joǵary salmaq dárejesinde qarsylas shaq keltirmedi.
Osylaısha, Qazaqstan delegatsııasy 4 altyn jáne 2 qola medal enshilep, jalpy esepte tórtinshi orynnan kórindi. Qytaı (11 altyn, 6 kúmis, 3 qola) jáne Japon (6 altyn, 7 kúmis, 7 qola) quramasy 20 júldemen kósh bastasa, Ońtústik Koreıa quramasy 14 júldemen (4 altyn, 3 kúmis, 7 qola) úzdik úshtikti túıindedi.
Sondaı-aq qazaqstandyq sportshylar búgin sýǵa júzý, gandbol, MMA, jaǵajaı voleıboly, nysana kózdeý jáne ýshý sportynan jarys jolyna shyqty.
