Azıada-2026: At sportynan jekeleı syndy qazaqstandyq shabandoz ashady
ASTANA. KAZINFORM – 3 qazan kúni Tokıodaǵy Equestrian Park kesheninde Azııa oıyndary aıasyndaǵy at sportynan eń tartysty básekelerdiń biri – konkýrdan jekeleı birinshiliktiń (Jumping Ind A) birinshi raýndy bastalady. Bul synda qurlyqtyń eń myqty shabandozdarymen qatar Qazaqstan namysyn 4 sportshy qorǵaıdy.
Jarys halyqaralyq «A» kestesi boıynsha ýaqytqa baǵyna otyryp ótedi (Table A, against the clock). Sportshylar úshin basty mindet – bıiktigi 145 sm bastap 155 sm deıin jetetin kúrdeli kedergilerdi qatesiz ári barynsha jyldam eńserý. Mundaǵy belgilengen qozǵalys jyldamdyǵy – mınýtyna 400 metr.
Týrnırge Azııa aımaǵynyń 13 elinen, sonyń ishinde Qazaqstan, Ózbekstan, BAÁ, Saýd Arabııasy, Japonııa, Ońtústik Koreıa jáne Qatardan jıyntyǵy 29 sportshy qatysady.
Jarys jolyna eń alǵashqy bolyp qazaqstandyq shabandoz shyǵady. Atap aıtqanda, qazaqstandyq sportshylardyń starttyq reti kelesideı:
1. Ksenııa Batalova jarysty ashatyn sapta kósh bastap, LADY DI esimdi sur bıesimen 1-shi bolyp shyǵady.
2. Raısa Sokolenko týrnırdiń ekinshi bóliginde URAN NAD WIGRAMI tulparymen 22-shi bolyp óner kórsetedi.
3. Nurıla Turysbekova QUIBELLE VAN D'ABELENDREEF atty sáıgúligimen 26-shy nómirde baq synaıdy.
4. Oleg Sokolenko otandyq sheberlerdiń ónerin qorytyndylap, CINDERELLA tory bıesimen 27-shi bolyp shabady.
Qazaqstan ulttyq quramasynyń sportshylary kúrdeli marshrýt pen qurlyqtyń eń myqty attaryna qarsy turyp, Azııa oıyndarynyń joǵary tuǵyrynan kórinýdi kózdeıdi.
Jarys Astana ýaqytymen saǵat 05:30-da bastalady.
Asa aýyr salmaqta óner kórsetetin qazaqstandyq boksshy Aıbek Oralbaı Japonııada ótip jatqan HH jazǵy Azııa oıyndarynda top jarǵanyn jazǵan edik.
