Azıada-2025: Qazaqstan quramasy qorjynyna alǵashqy medal tústi

HARBIN.KAZINFORM – Qytaıdyń Harbın qalasynda ótip jatqan IX qysqy Azııa oıyndarynyń alǵashqy altyn medal ıegeri anyqtaldy.

Short-trekten 2000 metrge syrǵanaýdan aralas komandalyq estafeta qatysýshylary Harbın qysqy Azııa oıyndarynyń alǵashqy júldegerleri atandy.

Fınalda Koreıa, Qytaı, Japonııa jáne Qazaqstan quramasy óner kórsetti. Qazaqstan quramasy sapynda Denıs Nıkısha, Ádil Ǵalıahmetov, ıAna Han jáne Malıka Ermek alańǵa shyqty.

Jarys kezinde otandastarymyz sheberlik baıqatyp, úshinshi oryndy saqtady. Alaıda, sońǵy sátte kósh basyndaǵy Qytaı sportshysy jarys jolynan shyǵyp qalyp, Koreıa komandasy chempıon atandy. Al Qazaqstan quramasy márege ekinshi bolyp jetti.

Qortyndy nátıje:

1. Koreıa (2 mınýt 41.534 sekýnd)

2. Qazaqstan (2 mınýt 42.258 sekýnd)

3. Japonııa (2 mınýt 44.058 sekýnd)

4. Qytaı (2 mınýt 59.057 sekýnd)

Sondaı-aq, Qazaqstandyq short-trekshiler búgin erler men áıelder arasyndaǵy 500 metr, 1000 metr jáne 1500 metrge syrǵanaýdan óner kórsetedi.

Eske salsaq, keshe otandastarymyz erler jáne áıelder arasyndaǵy 1500 metr, 500 metr jáne 1000 metrge syrǵanaýdan kelesi kezeńge sátti ótken bolatyn.