Azıada-2025: Hokkeıden Qazaqstan qyzdar quramasy Ońtústik Koreıany jeńdi
HARBIN. KAZINFORM - Hokkeıden Qazaqstan qyzdar quramasy Qytaıdyń Harbın qalasynda ótip jatqan qysqy Azııa oıyndarynyń sheshýshi matchynda jeńiske jetti.
Qazaqstan qyzdar quramasy A tobyndaǵy sońǵy matchynda Ońtústik Koreıaǵa qarsy oınaıdy.
Alǵashqy taımda qazaqstandyqtar qarsylas qaqpasyna 11 soqqy baǵyttady. Oıynnyń 6-mınýtynda qazaqstandyq shabýylshy Malıka Aldabergenova ońtaıly sátti paıdalanyp, qarsylas qaqpasyna shaıba soqty.
Ekinshi taımda ońtústikkoreıalyq oıynshy bizdiń sportshyǵa qarsy ereje buzyp, 5 mınýtqa alańnan shettetildi. Ókinishke qaraı qyzdar bul múmkindikti paıdalana almady.
Úshinshi taım bastala sala qazaqstandyq hokkeıshiler birden shabýylǵa shyǵyp, esep aıyrmasyn ulǵaıtýdy maqsat tutty. Urymtal sátterdiń birin sátti paıdalanǵan 21 nómerdegi qorǵaýshy ıÝlııa Býtorına qarsylas qaqpasynan sańlaý tapty. Al oıynnyń 53-mınýtynda Darııa Moldabaıdyń alystan baǵyttaǵan soqqysy qarsylas komandanyń qaqpasynda týlady. Osylaısha Qazaqstan quramasy A tobyndaǵy eki oıynda jeńiske jetti.
Endi osy toptaǵy taǵy bir sheshýshi oıyn Japonııa jáne Qytaı quramalary arasynda ótedi. Eger Japonııa jeńse altyn medal alady. Al, qazaqstandyq sportshylar kúmis júldege ıe bolady.
Osyǵan deıin habarlaǵanymyzdaı, qyzdarymyz A tobyndaǵy alǵashqy oıynda Japonııaǵa 0:4 esebimen jol bergen bolatyn. Esesine Qytaı quramasyna qarsy oıynda qazaqstandyqtar 2:1 esebimen jeńiske jetti.