Azıada-2023: Qazaqstan qorjynyna qos qola medal tústi

Qytaıdyń Hanjchoý qalasynda ótip jatqan Azııa oıyndarynda qazaqstandyq balýan Azat Sadyqov pen boksshy Natalıa Bogdanova qola júldeger atandy, dep habarlaıdy QazAqparat tilshisi.

A.Sadyqov 77 kelige deıingi salmaqta kúrespeı-aq júldegerler qataryna ilikti.

Onyń qarsylasy, kambodjalyq Keo Sophak jaraqatyna baılanysty kilemge shyqqan joq.

Taǵy bir qazaqstandyq Maqsat Saılaý 87 kelige deıingi salmaqta qola júlde úshin básekede japonııalyq Masato Sýmımen kúresip, qarsylasyna esh amal qyla almady – 1:9.

Osylaısha, baıraqty básekeni bastaǵan qazaqstandyq balýandar alǵashqy kúni bir kúmis, bir qola júldege qol jetkizdi. Erteń grek-rım kúresinen eki salmaqta jeńimpaz-júldegerler anyqtalady. Sodan keıin áıelder kúresine kezek tıedi.

6 qazan kúni jarysty erkin kúres sheberleri qorytyndylaıdy.

Boks básekesinde qazaqstandyq Natalıa Bogdanova jartylaı fınalda 66 kelige deıingi salmaqta taılandtyq Sývannafeng Djandjaımen qolǵap túıistirip, úsh ret nokdaýn alyp, nokaýtpen jeńilip qaldy.

Sóıtip ol fınaldan tys qalyp, qola júldeni qanaǵat tutty.

Qazaqstannan boks fınalynda Qamshybek Qońqabaev pen Karına Ibragımova ǵana óner kórsetedi.

Eske sala keteıik, budan buryn boksshy Karına Ibragımovanyń fınalǵa shyqqanyn jazǵan edik.

Sondaı-aq Meıirjan Shermahanbet Azıada fınalynda jeńilip, kúmis júldeni qanaǵat tutty.