Azıada-2018: Jalpy komandalyq esepte Qazaqstan toǵyzynshy orynǵa kóterildi
Búgingi kúnniń basty oqıǵalary.
Baıdarka men kanoede eskek esýshiler irikteýden súrinbeı ótti. Erteń qazaqstandyq sportshylar alty baǵdarlama boıynsha fınalda baq synaıdy. Palembangta ótetin eskek esýshiler dodasynyń tańǵy saǵat 07.30-da bastalatynyn eske salamyz.
Trıatlonshy Anastasııa Avtýshko úzdik ondyqtan syrt qaldy. Ol júzý, velojarys jáne júgirý qorytyndysy boıynsha 11-shi orynda.
Búgin Jakarta tatamıine shyqqan dzıýdoshylarymyz asa qýantpady. Bes sportshynyń bireýi ǵana qola júldeger atandy. 78 keliden joǵary salmaqta synǵa túsken Gúljan Isanova úzdikter qatarynda.
Regbıden Qazaqstan áıelder komandasynyń aıaq alysy jaman emes. Toptyq kezeńde Indonezııany jeńgen bizdiń sportshylar shırek fınalda Sıngapýrdi jeńdi. Endi Qytaımen kezdesip, kim myqtyny anyqtaıdy.
Qazirgi bessaıysta baq synaǵan Elena Potapenko jetinshi, Ardaq Ahıdýllaeva toǵyzynshy orynda.
Velotrekshiler búgin júldesiz qaldy. Keırınde Pavel Vorjev 11-shi, Sergeı Ponomarev 12-shi orynnan kórindi. Al medıson baǵdarlamasy boıynsha Sultanmurat Mıralıev pen Asylhan Turar tórttikke endi.
Basketboldan (5h5) Qazaqstan áıelder komandasy Azııa oıyndaryn besinshi orynmen aıaqtady. Olar besinshi oryn úshin ótken matchta taılandyqtardy jeńgen bolatyn.
Búgin boksshylar fınal joldamasyn sarapqa saldy. Ábilhan Amanqul (75 keli) men Aslanbek Shymbergenov (69 keli) aqtyq synda Azıada altynyna talasady. Ábilhannyń jartylaı fınaldaǵy qarsylasy jaraqatyna baılanysty sharshy alańǵa shyqqan joq. Al Aslanbek Shymbergenov ıordanııalyq qarsylasyn aıqyn basymdyqpen jeńdi.
Qazaqstandyq samboshylar búgin úsh medal jeńip aldy. Beıimbet Qanjanov pen Aıjan Jylqybaeva qolaǵa qol sozsa, Baǵlan Ibragım Azııa oıyndarynyń chempıony atandy.
31 tamyzdaǵy kórsetkish boıynsha Qazaqstan qorjynynda 64 medal bar. 12 altyn, 11 kúmis jáne 41 qola júlde. Jalpy komandalyq esepte biz 11-shi orynnan 9-shy orynǵa kóterildik.
