Azıada-2018: Gandbolshy qyzdar Qytaı quramasyn utyp ketti

ASTANA. QazAqparat - Djakarta men Palembangta ótip jatqan Jazǵy Azııa oıyndarynda gandboldan Qazaqstan qyzdar komandasy toptyq kezeńdegi ekinshi jeńisine qol jetkizdi, dep habarlaıdy QazAqparat tilshisi.

QR UOK-tiń baspasóz qyzmeti málim etkendeı Qazaqstan men Qytaı komandalary arasyndaǵy kezdesý asa tartysty ótti. Shıleniske toly birinshi kezeń 11:11 esebimen teń aıaqtalsa, ekinshi kezeńde qazaqstandyq komanda 16:15 esebimen basym boldy. Al sheshýshi sátterde gandbolshy qyzdarymyz qarsylastarynan bir upaı basymdylyǵymen jeńiske jetti. Qorytyndy esep - 27:26.

Jarystan keıin óz áserimen bólisken qazaqstandyq gandbolshy Natalıa Ilına Qytaımen kezdesý ońaı bolmaǵanyn atap ótti.

«Óte tartysty ótken match. Mundaı kezdesýlerde dop tek bir qaqpaǵa ǵana soǵylmaıdy. Eki komandanyń da jeńiske degen jigeri mol boldy. Dese de, biz komandalyq oıynnyń arqasynda jeńiske jettik. Qazaqstan birinshiliginde mundaı matchtardy kúnde oınaı bermeısiń. Sol sebepti, keıde qatelik jibergen kezder de boldy. Eń bastysy - biz jeńdik», - deıdi Ilına tilshilerge bergen suhbatynda.

Eske sala keteıik, irikteý aınalymyndaǵy alǵashqy matchta Qazaqstan komandasy Úndistanmen kezdesip, 36:19 esebimen jeńiske jetken bolatyn.