Azıada-2018: Eldos Smetovty jarystan keıin aýrýhanaǵa alyp ketti

ASTANA. QazAqparat - Jakartada ótip jatqan Azııa oıyndarynda Rıo Olımpıadasynyń kúmis júldegeri Eldos Smetovty jarystan keıin aýrýhanaǵa alyp ketti, dep habarlaıdy QazAqparat tilshisi.

QR Ulttyq olımpıadalyq komıtetiniń baspasóz qyzmeti qabarlaýynsha, dzıýdodan Qazaqstan komandasynyń kóshbasshysy Eldos Smetov Jakartada aýrýhanaǵa jetkizildi.

Birinshi aınalymda qarsylasyn aıqyn basymdyqpen jeńgen Eldos ekinshi kezdesýde Soltústik Koreıa balýanynan eskretý sanymen utylǵan bolatyn.

Osy jekpe-jekten soń Eldos Smetovti aýrýhanaǵa alyp ketti.

«Jańa ǵana Eldosty jedel járdem aýrýhanaǵa alyp ketti. Rentgennen ótkizedi. Ekinshi beldesý kezinde jaraqat alǵan. Oń jaq qabyrǵasy syndy degen boljam bar», - deıdi dzıýdodan Qazaqstan komandasynyń dárigeri Natalıa Kýdasheva.

Aıta ketelik, Eldos Smetov jubanysh beldesýine de shyqqan joq.

Eske salaıyq, Jakartada ótip jatqan Azııa oıyndarynda qazaqstandyq dzıýdoshy, Rıo Olımpıadasynyń kúmis júldegeri Eldos Smetov jarysty jeńispen bastaǵan edi. Degenmen, ekinshi aınalymda Soltústik Koreıa sportshysynan utyldy. 



FOTO: Danııar Maılybaev, Qazaqstan UOK baspasóz qyzmeti