Azıada-2017: Medalǵa ıe bolǵan qazaqstandyq sportshylar qansha syıaqy alady
SAPPORO. QazAqparat - Japonııanyń Sapporo qalasynda ótken VIII qysqy Azııa oıyndarynyń chempıondary men jeńimpazdary qansha syıaqy alatyny anyqtaldy, dep habarlaıdy QazAqparat tilshisi.
Elimizdiń sport zańdaryna sáıkes, halyqaralyq arenada Qazaqstan namysyn bıikten kórsetken sportshylarymyzǵa aqshalaı syıaqy berý kózdelgen bolatyn. Ol QR 2014 jyldyń 19 jeltoqsanyndaǵy №1435-inshi Jarlyǵymen rettelgen. Sol zań-erejelerge súıensek, Azııa oıyndarynda jeńimpaz atanǵan sportshyǵa - 10 myń, kúmis júldegerge - 5 myń, al qola medal alǵandarǵa 3 myń AQSh dollary beriletini anyq kórsetilgen.
Japonııanyń Sapporo qalasynda ótken VIII qysqy Azııa oıyndarynda Qazaqstan quramasy 32 júldege - 9 altynǵa, 11 kúmis jáne 12 qolaǵa ıe boldy. Medaldar sanyna qarap, qaı sportshy qansha syıaqy alatynyn esepteı berýge bolady.
Komandalyq oıyndar men estafetaǵa qatysýshylarǵa da osyndaı somma jeke-jeke tólenedi. Osylaısha, hokkeıden Qazaqstan quramasynyń 22 oıynshysy birinshi oryn úshin árqaısysy 10 myń dollardan alady.
Al bapkerler Ýnıversıada men Olımpıadaǵa qaraǵanda Azııa oıyndarynda sportshylardan azyraq syıaqy alady. Altyn júlde úshin bapker - 5 myń, kúmiske - 3 myń, al qola úshin 2 myń AQSh dollaryna ıe bolady.
Jalpy, Azıada-2017 saıystarynda júlde alǵan sportshylar men bapkerlerge memleket 693 myń dollar nemese 215 mıllıon 523 teńge jumsaıdy. Syıaqy respýblıkalyq bıýdjetten tólenedi.
Aıta keteıik, Ýnıversıada-2017 saıystarynda sportshylar men bapkerlerge 458 mıllıon 200 myń teńge, Olımpıada-2016 úshin 1 mıllıard 551 myń 420 teńge tólendi.
