Azıada-2017: Qytaıdy qýyp jetýge jaqyndap qaldyq

SAPPORO. QazAqparat - Búgin Sapporo qalasynda ótip jatqan VІІІ qysqy Azıada oıyndary qazaq sportshylary úshin asa tabysty boldy, dep habarlaıdy Japonııadan QazAqparat tilshisi.

Búgin Qazaqstan quramasy bir kúnde 2 altyn, 2 kúmis, 1 qola jalpy 5 medal jeńip alyp, júlde sany boıynsha úshinshi orynǵa jaqyndap qaldy.

Besinshi jarys kúni bıatlonshylarymyz Galına Vıshnevskaıa men ıAn Savıtskıı altyn alsa, Vasılıı Podkorytov pen Elena Kolomına kúmis, al Alına Raıkova qola medalǵa qol jetkizdi.

Al osyǵan deıin jerlesterimizdiń qorjynynda 1 altyn, 2 kúmis jáne 4 qola medal bolǵan. Búgin jalpy medaldar sany 12-ge jetti. Onyń úsheýi altyn, tórteýi kúmis, beseýi qola medal. Osy kórsetkishpen qazaqstandyq sportshylar jalpy esepte tórtinshi orynda keledi.

Sondaı-aq, búgingi hokkeıshi arýlarymyzdyń da eren erligin aıta ketýimiz kerek. Olar qarsylastarynyń qaqpasyna jaýapsyz 19 shaıbany toǵytty. Sonymen birge 17 jasqa endi tolǵan mánerlep syrǵanaýshy arýymyz Elızabet Tursynbaeva qysqa baǵdarlamadan synǵa túsip, altynshy orynǵa taban tiredi.

Al jalpy esepte Japonııa quramasy kóshbasshylyqty eshkimge bermeı keledi. Olardyń enshisinde qazirgi tańda 45 júlde (14 altyn, 15 kúmis, 16 qola) bar. ekinshi oryndaǵy Ońtústik Koreıa quramasy Kúnshyǵys elin ókshelep qýyp keledi. Bularda jalpy medaldar sany az bolǵanymen altyn medaldar sany jaǵynan tarazy basy teńesip tur. Ońtústikkoreıalyqtardyń enshisinde 35 júlde (14 altyn, 12 kúmis, 9 qola) bar.

Bizdiń eldiń sportshylarynan bir saty joǵary túrǵan Qytaı quramasynda  18 júlde (6 altyn, 6 kúmis jáne 6 qola) bar. Qazaq sportshylary búgingi qarqynymen medaldar sanyn arttyra berse, Qytaıdy basyp ozýǵa múmkindik bar ...