Azıada-2017: Qazaqstan - Sapporoda medal alǵan tórtinshi el
SAPPORO. QazAqparat - Búgin Sapporo qalasynda ótip jatqan VІІІ qysqy Azııa oıyndarynda Qazaqstan medal enshilegen tórtinshi memleket boldy, dep habarlaıdy Sapporodaǵy QazAqparat tilshisi.
Ekinshi kúnniń qorytyndysy boıynsha Qazaqstan shańǵyshy Elena Kolomına jeńip alǵan medalmen jalpy esepte tórtinshi orynda tur.
Kolomına medaldi shańǵynyń 1,4 shaqyrymǵa klassıkalyq ádispen júgirý túrinen jeńip aldy.
Qazir jalpy esepte Ońtústik Koreıa quramasy kósh bastap keledi. Olardyń qorjynynda 14 júlde (6 altyn, 3 kúmis jáne 5 qola) bolsa, ekinshi orynda Japonııa quramasy tur. Jergilikti sportshylardyń enshisinde 12 júlde (3 altyn, 5 kúmis, 4 qola) medal bar. Al úzdik úshtikti Qytaı eliniń sportshylary túıindep tur. Olarda 9 medal (3 altyn, 3 kúmis, 3 qola) bar. Qazaqstan bir kúmis júldesimen tórtinshi orynda.
Al ózge memleketter áli birde-bir júldege qol jetkize alǵan joq.
Esterińizge sala keteıik, búgin qazaqstandyq sportshylar sporttyń alty túrinen: kerlıng, shańǵy jarystary, shaıbaly hokkeı, snoýbord, konkımen júgirý sporty, short-trekten óner kórsetti. Sapporoda ótip jatqan VIII Azııa oıyndary 26 aqpanǵa deıin jalǵasady. Osy aralyqta sporttyń 11 túrinen 64 júlde sarapqa salynady.
