Ajyrasýǵa nıettengen jubaılarǵa sotta Ekzıýperıdiń áıgili týyndysyn oqý mindetteldi
ASTANA. QazAqparat - Argentınalyq sýdıa ajyrasýǵa ótinish bergen erli-zaıyptylardy endi sotqa balalarymen birge kelip Antýan de Sent-Ekzıýperıdiń álemge áıgili «Kishkentaı hanzada» povesin oqýǵa mindettegen.
Sondaı-aq olar etıka men adamgershilik qundylyqtaryn nasıhattaıtyn basqa da ádebı shyǵarmalardy oqýlary tıis, dep jazady RIA Novostı.
Mundaı sheshimdi Rosarıo qalasynyń otbasylyq ister jónindegi sýdıasy Rıkardo Dýtto qabyldaǵan. Ol qandaı da bir qarym-qatynas jasaýdan bas tartqan ata-analardyń áreketiniń kesirinen olardyń balalary zardap shegedi, deıdi. Mundaıda ásirese, balalardyń biri ákesinde, al ekinshisi sheshesinde qalatyn jaǵdaı olarǵa aýyr soqqy bolyp tıedi eken.
Osylaısha, sýdıa ajyrasýǵa nıet bildirgen ata-analar bir aı boıy aptasyna bir ret sotqa kelip, arnaıy qyzmetkerdiń qadaǵalaýymen «Kishkentaı hanzada» shyǵarmasyn, «Balalardyń quqyqtary týraly konventsııa» men ıspandyq fılosof Fernando Savaterdiń «Amadorǵa arnalǵan etıka» atty adamgershilik máselelerine arnalǵan kitabyn oqýy tıis degen qaýly shyǵardy. Osyndaı áreket arqyly ata-analar óz balalaryn jaqsyraq túsinip, olardyń tálimdi tárbıe men bilim alýlaryna yqpalyn tıgize alady dep sanaıdy sot ókili.
Aıta keteıik, Antýan de Sent-Ekzıýperıdiń «Kishkentaı hanzada»(«Malenkıı prınts» - «Le Petit Prince») kitaby alǵash ret 1946 jyly Nıý-Iorkte basylyp shyǵyp, búgingi kúnge deıin 265 tilge aýdarylǵan, satylym mólsheri 145 mıllıon danaǵa jetken. Onyń qazaq tilindegi nusqasy - «Kishkentaı Shahzada» belgili jazýshy Táken Álimqulovtyń aýdarýymen 1967 jyly «Jazýshy» baspasynan jaryq kórgen edi.
