Ajyrasý faktileriniń ósýi kúrdeli máselege aınaldy - depýtat
«Nur Otan» partııasynyń saılaýaldy baǵdarlamasynda da otbasyn qoldaý jáne nyǵaıtý – elimizdiń tabysty damýynyń kepili dep kórsetilgen. Ony oryndaýǵa, ıaǵnı halyqtyń laıyqty ómir súrýine zańnamalyq, áleýmettik jáne jan-jaqty qoldaýǵa zań turǵysynan barynsha múmkindikter jasalyp keledi. Óıtkeni, turaqty otbasyn qurý, kópbalaly bolý – ultymyzdyń sanyn eselep arttyrýdyń negizi. Alaıda, qoǵamdaǵy otbasy ınstıtýtynyń álsireýi, onyń ishinde nekelesý sanynyń azaıýy men ajyrasý faktileriniń ósýi kúrdeli máselege aınaldy. Sońǵy jyldary bul problema jastar arasynda da kóbeıip bara jatqandyǵy jasyryn emes. Yqylym zamannan urpaq órbitip, kóbeıýdi ósıet etken salt-dástúrimizdi ustanýǵa ne kedergi? Bárin áleýmettik jaǵdaıǵa silteı salý qısyndy ma? Bizdińshe, óte mańyzdy problemanyń tereń túbiri – jastardyń tárbıesinde, olardyń ortasyna baılanysty sııaqty», - dedi D. Myńbaı.
Osy oraıda ol ajyrasý kezinde balalar eń kóp zardap shegetinin atap ótti.
«Dúnıe-múlik bólisý, balalardyń turǵylyqty jerin anyqtaý daýy, alıment, týystyq qatynastardyń úzilýi sııaqty máselelerdiń aýyrtpalyǵy da, moraldy-áleýmettik qıynshylyqtary da jeterlik.
Tolyq emes otbasyda tolyqqandy bozbala men boıjetkendi tárbıeleý de ońaı bolmas. Otbasy jaıly ulttyq baıandama men resmı statıstıkalyq málimetter boıynsha 2015-2019 jyldar aralyǵynda ajyrasqan otbasylardyń sany 274,5 myńdy qurap, ıaǵnı jalpy tirkelgen nekelermen salystyrǵanda, ajyrasý sany 43 paıyzǵa deıin kóterilgeni baıqaldy», - dedi depýtat.
Onyń aıtýynsha, 2019 jyldyń qorytyndysy boıynsha 59 796 (119 592 adam) neke buzylǵan.
«Sol jyly 120 myńǵa jýyq adam nekesin buzsa, onyń árbir ekinshisi, ıaǵnı 60 myńnan astamy 18-35 jas aralyǵyndaǵy jastar. Ajyrasýlardyń basym bóligi 30-34 jas aralyǵyndaǵy jas otbasylarǵa tıisti. Ǵalamdyq indetke baılanysty úılený men ajyrasý tómendegenin eskergenniń ózinde, bul jaǵdaıǵa beı-jaı qaraýǵa bolmaıdy», - dedi D. Myńbaı.
Joǵaryda baıandalǵan aqparattardyń negizinde ajyrasý jaǵdaılaryn azaıtý úshin, sondaı-aq bul úrdisti tejeý maqsatynda mynadaı usynystar engizildi:
1. Orta jáne joǵary oqý oryndarynda otbasy mádenıeti qundylyqtaryn saqtaýǵa, qasterleýge baǵytalǵan ozyq tájirıbeni oqytý jáne nasıhattaý boıynsha arnaıy fakýltatıvterdi engizýdi qarastyrý;
2. Sot aldyndaǵy otbasylyq medıatsııa sarapshylarynyń jumysyn yntalandyrýǵa, erli-zaıyptylardyń tatýlastyrý merzimin barynsha uzartýǵa, ıaǵnı olardyń raıynan qaıtýyna múmkindik jasaǵan jón.
3. Qazaqstan Prezıdenti Joldaýynda zeınetaqy jınaǵynyń jetkilikti mólsheriniń sheginen asatyn bóligin turǵyn úı satyp alý maqsatynda «Otbasy bankine» aýdarýǵa ruqsat berý qajet dep atap kórsetti. Kópbalaly otbasylar úshin de bank tarapynan yntalandyrý jáne qoldaý mehanızmin jetildirý;
4. Menshik túrine qaramastan barlyq mekemelerde, uıymdar men ujymdarda «Mereıli otbasy» baıqaýy ótkizilýi tıis. Áleýmettik jeliler men buqaralyq aqparat quraldarynda otbasy qundylyqtaryn zamanaýı formatta dáripteıtin aqparatty, vıdeo-kontentti kóbeıtý.
