Ajyrasqan erli-zaıyptylar qaıtadan otbasy qurýǵa asyqpaıdy - maman
«Mańǵystaý áıelder kóshbasshylyǵy mektebi» Qoǵamdyq birlestigi ótkizgen sharanyń maqsaty - qazirgi qoǵamdaǵy otbasy máselelerin talqylaý. Jas otbasylarǵa neke máselelerin sheshýge kómektesý.
«Mańǵystaý áıelder kóshbasshylyǵy mektebi» qoǵamdyq birlestiginiń tóraıymy Roza Mahanbetovanyń aıtýynsha, qazirgi qoǵamdaǵy otbasy ınstıtýty qoldaý men qorǵaýdy qajet etedi. Sebebi, búginde otbasy qundylyqtary men prıntsıpteri álsiregen.
«Búginde jastar materıaldyq qundylyqtardy joǵary qoıady. Olar qoǵamnyń uıashyǵyn qurýdan góri aqsha tabýǵa kóbirek qyzyǵýshylyq tanytady. Otbasylyq qatynastardaǵy problemalar ajyrasýǵa ákeledi. Alaıda, ár adam erte me, kesh pe, otbasy kerek ekenin túsinedi. Otbasynyń negizi - zańdy nekege bekitilgen jup», - dedi Roza Mahanbetova.
Birlestik tóraıymy búginde jastar araynda beleń alǵan azamattyq neke taqyrybyn kóterdi.
«Elimizde ajyrasý statıstıkasy jyl saıyn artyp keledi. Birneshe jyl birge jáne baqytty ómir súrgennen keıin de erli-zaıyptylar ajyrasý týraly sheshim qabyldaıdy. Saldarynan qanshama otbaynyń shańyraǵy shaıqaldy. Balalardyń psıhologııasy buzyldy. Erli-zaıyptylar eki jaqqa ketkennen keıin óz baqytyn taýyp, qaıtadan otbasy qurýǵa asyqpaıdy. Kóbine azamattyq nekede turady», -dedi ol.
Avtory: Ásel Tumashqyzy