Ajyrasý úrdisin tereńirek zertteý úshin keshendi baıandama ázirlenedi

ASTANA. KAZINFORM — Elimizdegi ajyrasý úrdisin tereńirek zertteý úshin keshendi baıandama ázirlenedi. Bul týraly Májilis depýtattarynyń saýalyna Premer-mınıstr Oljas Bektenovtiń jaýabynda aıtylǵan. 

— Ulttyq statıstıka bıýrosynyń aqparatyna sáıkes, sońǵy 5 jylda elde ajyrasý sany (2020 jyly — 48,2 myń, 2024 jyly — 40,5 myń, 16 paıyzǵa tómendegen) azaıǵan. Mundaı úrdis memlekettik qoldaý saıasatynyń túbegeıli qaıta qaralýymen baılanysty boldy. Dástúrli otbasylyq qundylyqtardy damytýdyń 2025 jylǵa arnalǵan medıa-jospary qabyldandy. Túsindirý jumystary aıasynda áleýmettik jeliler, syrtqy jarnama, bilim berý mekemeleri, AHAT organdary men bedeldi qoǵam kóshbasshylary tartylyp otyr, — dedi Oljas Bektenov jaýabynda.

Úkimet basshysy atalǵan úrdisterdi tereńirek zertteý úshin Mádenıet jáne aqparat mınıstrligi keshendi baıandama daıyndaıtyndyǵyn aıtady.

— Zertteý jumystary bastaldy. Onyń nátıjesinde jastar arasynda otbasylyq qundylyqtardy qalyptastyrý jáne otbasylyq ınstıtýtty nyǵaıtýǵa arnalǵan usynystar ázirlenedi, — dedi ol.

Aıta keteıik, byltyr 124 myń juptyń nekesi qıylsa, 61 jup ajyrasýǵa ótinim bergen.  Qazirgi ýaqytta Senat qaraýynda jatqan jańa Salyq kodeksiniń jobasynda nekeni buzǵany úshin memlekettik baj mólsherin 19 660 teńgege deıin ulǵaıtý qarastyrylǵan.