Ajyrasý tártibi ózgeredi: neni bilý kerek

ASTANA. KAZINFORM — Bıyl 16 qyrkúıekten bastap elimizde neke buzý tártibi ózgeredi.

2011 jylǵy 26 jeltoqsandaǵy «Neke (erli-zaıyptylyq) jáne otbasy týraly» Qazaqstan Respýblıkasynyń Kodeksine ózgerister men tolyqtyrýlar engizildi. Qujat jobasy «Ashyq NQA» portalynda jarııalandy. 

Atap aıtqanda, atalǵan kodekstiń 17-babynyń 2-tarmaǵyna jańa tarmaqsha engizildi:

— Eger erli-zaıyptynyń birine quzyrly organdar halyqaralyq izdeýge jarııalasa, sot sanktsııasymen halyqaralyq izdeý merzimi 3 jyl tolǵannan keıin neke buzylady, — delingen qujatta.

Osyǵan uqsas tolyqtyrý nekeni sot arqyly buzý tártibin retteıtin kodekstiń 238 jáne 241-babyna da engizilgen.

— Bul degenimiz, eger jubaıy uzaq ýaqyt boıy jasyryn júrip, halyqaralyq izdeýde bolsa, ekinshi tarap onyń qatysýynsyz sotqa júginip, nekeni resmı túrde buza alady, — dep túsindirilgen.

Aıta keteıik, elimizde ajyrasý úrdisin tereńirek zertteý úshin keshendi baıandama ázirlenedi. 

Sondaı-aq áleýmettanýshy ajyrasýdyń kóbeıý sebebin ataǵan edi.