Ajyrasý isteriniń neshe paıyzy lýdomanııadan bolady – sýdıa pikiri
ASTANA. KAZINFORM – Astana qalasynyń kámeletke tolmaǵandar ister jónindegi mamandandyrylǵan aýdanaralyq sotynyń tóraǵasy Leıla Zınasheva ajyrasý isi boıynsha jasalatyn medıatsııalyq kelisimderden alımentten bas tartý tetigin alyp tastaýdy usyndy.
«Sot májilisinde ajyrasý talabyn qoıýshylardyń kóbi analar. Olardyń ishinde alımentti resmı tóletýden bas tartatyndar bar. Aıtatyn ýájder – balasy bolǵandyqtan da bylaı da kómektesedi. Bizde medıatsııa qyzmeti damyǵannan beri medıatsııalyq kelisimniń kúshin joıý týraly daýlar paıda bola bastady. Óıtkeni medıatsııalyq kelisimderdiń keıbirinde anasy alımentten bas tartatyny kórsetiledi. Meniń oıymsha, mundaı kelisimge jol berýge bolmaıdy. Óıtkeni osyndaı kelisimge kelý arqyly áke men ana balanyń quqyǵyn, zańdy múddelerin taptaıdy. Bala kámeletke tolmaǵandyqtan ondaı kelisim jasaı almaıdy. Jalpy ata-ananyń ekeýi de qaı jaqta júrse de balasyn asyraýǵa jaýapty. Men osynda kelisimderge jol bermeý úshin medıatorlardyń ádep erejesin bekitý kerek dep oılaımyn. Sol erejege osy alıment máselesin naqtylaıtyn normalar engizýdi usynamyn», - deıdi sýdıa.
Sondaı-aq, ol lýdomanııanyń ajyrasý statıstıkasyna qalaı áser etip jatqanyn aıtty.
«Ajyrasý talabymen kelgen 100 istiń ishinde bir-ekeýi istiń sebebi lýdomanııa bolyp jatady. Biraq bul naqty statıstıka deýge bolmaıdy. Óıtkeni Sotqa júginýshilerdiń bári ajyrasýdyń sebebin ashyp aıta bermeıdi. Sot ony qazbalap suraı almaıdy. Zańda sondaı norma bar. Eki tarap ajyrasýdyń sebebin sotqa aıtpaımyz dep sheshse, sýdıa qazbalap suraı almaıdy. Al bir tarap ajyrasýǵa kelispeıtin bolsa, sondaı jaǵdaıda ǵana sebebin qazbalap suraımyz», - dedi Leıla Zınasheva.
