Ajyrasqan erli-zaıyptylardyń ekeýi de deklaratsııa ótkizýge mindetti me
ALMATY. KAZINFORM – Almatyda jalpyǵa birdeı deklaratsııalaýdyń úshinshi kezeńi ótip jatyr. 250.00 jáne 270.00 nysandary boıynsha deklaratsııalardy tapsyrý merzimi 15 qyrkúıek kúni aıaqtalady.
Almaty qalasy boıynsha Memlekettik kirister departamentiniń málimetine sáıkes, búgingi kúni megapolıste aktıvter men mindettemeler týraly deklaratsııany (250.00 nysan) 3-kezeńdegi 342,9 myń mindetti tulǵanyń 255 myńy tapsyrǵan, bul barlyǵynyń – 75%-y. Jalpyǵa birdeı deklaratsııalaýdyń úshinshi kezeńinde zańdy tulǵalardyń basshylary, quryltaıshylary (qatysýshylary) jáne olardyń jubaılary, sondaı-aq jeke kásipkerler jáne olardyń jubaılary deklaratsııa tapsyrýǵa mindetti.
Degenmen Memlekettik kirister departamentinde 2024 jyly 2 qańtardan bastap tirkelgen kásipkerler bıyl deklaratsııany tapsyrý mindetinen bosatylatynyn naqtylady. Óıtkeni 2023 jyldyń 31 jeltoqsandaǵy jaǵdaı boıynsha olar kásipker retinde tirkelmegen. Alaıda olar deklaratsııany tórtinshi kezeńde, ıaǵnı 2025 jyly tapsyrýy qajet.
Sondaı-aq departament baspasóz qyzmeti ártúrli sebeptermen mindetti tulǵalardyń jubaılary deklaratsııany tapsyrý boıynsha mindettemeni oryndamaı jatqanyn habarlady.
«2024 jyly ajyrasqan, biraq 2023 jylǵy 31 jeltoqsanda zańdy nekede turǵan erli-zaıyptylardyń ekeýi de deklaratsııany tapsyrýǵa mindetti», – dep habarlady Memlekettik kirister departamentinen.
Aıta ketken jón, deklaratsııany «Salyq tóleýshi kabıneti» (cabinet.kgd.gov.kz), «Elektrondyq úkimet» portaly (egov.kz), «e-Salyq Azamat», «eGov mobile» mobıldi qosymshalary arqyly usynýǵa bolady.
