Ájim ketiretin ekpe kózdiń kórý qabiletin nasharlatady - ǵalymdar
ASTANA. QazAqparat - Amerıkanyń oftalmolog-dárigerleriniń málimetinshe, kózdiń aınalasyna, mańdaıǵa egiletin kosmetıkalyq jasartatyn ekpe kóz torynyń ıshemııalyq isinýine jáne kózdiń kórmeı qalýyna ákelýi múmkin. Olar jasartatyn ekpeden soń oryn alǵan qaıǵyly úsh jaǵdaı týraly JAMA Ophthalmology jýrnalyna jarııalady.
Bettegi ájimderi ketirip, terini tegisteıtin maı, kollagen, gıalýrondyq qyshqyl jáne basqa da gel tárizdi jasartatyn ekpe sońǵy jyldary suranysqa ıe kosmetıkalyq protsedýralardyń biri bolyp tabylady. Bul kóbinese ekken tustardyń kógerip nemese isip ketýine ákelip soǵady. AQSh-tyń Ónimder jáne dári-dármek basqarmasy atalmysh ekpeni eriniń aınalasyndaǵy bettiń ortańǵy bólikterine ǵana paıdalanǵan durys dep sanaıdy. Sebebi, qazir sulýlyq salondarynda jasalatyn ekpeler dárigerdiń taǵaıyndaýy boıynsha qoldanylmaıdy. Sonyń saldarynan kóptegen qıyndyqtar týyndap otyr.
Atap aıtqanda, oftalmolog Mıshel Karl pen Retina Vitreous Associates Medical Group ortalyǵyndaǵy onyń áriptesteri Los-Andjeleste ekpeden soń úsh adamnyń kórý qabileti nasharlap qalǵanyn aıtyp otyr. Patsıentterdiń bári 40 jas shamasyndaǵy áıelder mańdaıyndaǵy ájimdi ketirý úshin buqa kollageni men artefıll bıogeli ekpesin jasatqan. Protsedýradan keıin biriniń oń jaq kózi, qalǵan ekeýiniń eki kózi kórmeı qalǵan.
«Osyndaı protsedýralardy jasamas buryn, keńes bergen kezde patsıentterge teriasty ekpeleriniń keri áseriniń ishine kózdiń kórý qabiletin joǵaltý táýekelin eskertip, aldyn ala habardar etý kerek», - deıdi oftalmtlog Mıshel Karl.
