Ájethanadaǵy qyzdar tóbelesi: ShQO prokýratýrasy isti sotqa jiberdi

ÓSKEMEN. QazAqparat – Shyǵys Qazaqstan oblysynda ájethanada stýdent qyzdy soqqyǵa jyqqan oqýshyǵa qatysty qylmystyq is aıaqtalyp, is sotqa jiberildi, dep habarlaıdy QazAqparat tilshisi.

ShQO polıtsııa departamenti baspasóz qyzmetiniń málimetine súıensek, oqıǵaǵa kámeletke tolmaǵan jeti balanyń qatysy bar. Tártip saqshylary tergeý barysynda olardyń barlyǵynan jaýap aldy.

«Qazirgi ýaqytta tergeý amaldary aıaqtaldy. Prokýratýra tergeýdiń barlyq materıaldaryn zerdelep shyqty. Іs sotqa joldandy», - delingen aqparatta.

Belgili bolǵandaı, sottyń alǵashqy otyrysy 5 mamyr kúni ótedi.

Eske salsaq, sáýir aıynyń basynda oqýshy qyzdyń kolledj stýdentin soqqyǵa jyǵyp jatqany týraly vıdeo áleýmettik jelide tarap, kóptiń qyzý talqysyna túsken edi. Belgili bolǵandaı, bul oqıǵa naýryz aıynda Óskemendegi «ADK» saýda ortalyǵynyń ájethanasynda bolǵan.

Kóp uzamaı jelide kúdikti qyzdyń ákesi Antıkorda jumys isteıtini týraly aqparat tarady. QR Sybaılas jemqorlyqqa qarsy is-qımyl agenttigi ShQO boıynsha departamentiniń basshysy Denıs Shakenov oqıǵaǵa qatysqan adamdardyń Antıkor qyzmetkerlerimen eshqandaı týystyq baılanysy joqtyǵyn habarlady.