Ájethanadaǵy qyzdar tóbelesi: ShQO-da jábir kórgen boıjetkenge psıhologııalyq kómek kórsetilýde
Osy aıdyń basynda oqýshy qyzdyń kolledj stýdentin soqqyǵa jyǵyp jatqany týraly vıdeo áleýmettik jelide tarap, kóptiń qyzý talqysyna túsken edi. Belgili bolǵandaı, bul oqıǵa naýryz aıynda Óskemendegi «ADK» saýda ortalyǵynyń ájethanasynda bolǵan.
Oblystyq Polıtsııa departamenti osyǵan qatysty QR Qylmystyq Kodeksiniń 293-baby 2-bóligi (buzaqylyq) boıynsha sotqa deıingi tergeý amaldary júrgizilip jatqanyn málim etken. Kóp uzamaı jelide kúdikti qyzdyń ákesi Antıkorda, al anasynyń qalalyq Bilim bóliminde jumys isteıtini týraly aqparat tarady. QR Sybaılas jemqorlyqqa qarsy is-qımyl agenttigi ShQO boıynsha departamentiniń basshysy Denıs Shakenov oqıǵaǵa qatysqan adamdardyń Antıkor qyzmetkerlerimen eshqandaı týystyq baılanysy joqtyǵyn habarlady.
Búgin jábirlenýshi qyzdyń týǵan apaıy Toǵjan Dosýmova BAQ ókilderimen kezdesip, oqıǵaǵa qatysty túsinik berdi.
«Qazir sińilim meniń qolymda turyp jatyr. Onyń osyndaı jaǵdaıǵa tap bolǵanyn estigen soń birden polıtsııaǵa habar berdik. Tergeý amaldary júrip jatqandyqtan oqıǵanyń jaı-japsaryn túgel aıta almaımyn. Ol úshin tergeý aıaqtalyp, sot sheshimi shyǵýy kerek. Bir aıtarym, kıkiljiń aradaǵy jigitpen baılanysty bolǵan», - deıdi ol.
Onyń aıtýynsha, sińilin soqqyǵa jyqqandar qomaqty aqsha da talap etken.
«Sińilim óte aýyr psıhologııalyq soqqy aldy. Tuıyq bolyp ketti. Densaýlyǵyn áli de teksertip jatyrmyz. Sol oqıǵadan keıin eki apta aýrýhanada jatyp shyqty», - deıdi Toǵjan Dosýmova.
Osy rette, QazAqparat tilshisi ShQO Bilim basqarmasyna da habarlasyp kórdi. Basqarma basshysy Inessa Chernyshevanyń aıtýynsha, qazir jábirlenýshimen psıhologtar jumys istep jatyr.
«Boıjetkenniń betinen kógergen izderdi baıqaǵan kolledj basshylyǵy birden ata-anasyna habarlasty. Qazir óz quzyrettiligimiz sheńberinde qoldan kelgenniń bárin jasap jatyrmyz. Stýdentke psıhologııalyq kómek kórsetilýde. Al soqqyǵa jyqqan mektep oqýshysynyń anasy rasymen de Óskemen qalalyq bilim bóliminde qyzmet etken. Biraq ol bul oqıǵadan keıin óz erkimen jumystan shyǵyp ketti», - deıdi ol.