Ájethana ishinde stýdentti zorlamaq bolǵan aqtóbelik sottaldy

AQTÓBE. KAZINFORM - №2 Aqtóbe qalalyq soty 35 jastaǵy sottalýshyny 6 jylǵa bas bostandyǵynan aıyrdy. Sonymen birge oǵan ishimdikke qarsy em alý mindetteldi. Іs jabyq rejımde qaraldy. Tek úkim ashyq oqyldy.

Orta bilimdi, jumysy joq aqtóbelik Aqtóbe qalasyndaǵy dámhanalardyń birine kirip, ondaǵy ájethanaǵa barady. Mas kúıinde áıelderge arnalǵan jaǵyna kirip, esigin kúshtep ashpaq bolady. Qolyna shanyshqy ustaǵan kúıi ishindegi stýdent qyzǵa tarpa bas salady. Stýdent qarsylasyp, kúshtep ıterip, sytylyp shyǵyp, kómek suraıdy. Sol kezde dámhanada otyrǵan er adamdar shuǵyl jetip, kómek kórsetedi. Sot úkimimen aıyptalýshy kináli dep tanylyp, 6 jylǵa bas bostandyǵynan aıyryldy.

- Qylmystyq kodekstiń 24-baby 3-bóligi, 120-baby 1-bóligimen kózdelgen qylmysty jasaǵany úshin kináli dep tanylyp, 6 jyl merzimge bas bostandyǵynan aıyrý jazasy taǵaıyndalsyn. Jazany óteý orny - qylmystyq atqarý júıesiniń ortasha qaýipsizdik mekemesi. Moraldyq zııan úshin ótemaqy esebin 1,5 mln teńge óndirilsin, - dedi sýdıa.

Úkim kezinde sýdıa sottalýshynyń shyn nıetpen ókingenin jazany jeńildetetin mán-jaı dep eseptedi. Al mas kúıinde qylmys jasaǵany jazany aýyrlatty. Sot-narkologııalyq saraptama qorytyndysyna sáıkes ol májbúrli túrde em alady.

- Dámhanaǵa kirip, jan-jaǵyna qarap, adam joq ekenine kóz jetkizip, mas kúıinde ájethananyń áıelder jaǵynda jábirlenýshini zorlaýǵa oqtalǵan. Qolyndaǵy shanyshqymen qorqytqan. Onyń bári beınejazbada anyq kórinip tur. Sotta kýálar da aıtyp berdi. Júgirip barǵan jas jigitter sottalýshynyń qylmystyq oıyn aqyryna deıin jetkizýge múmkindik bermeı, syrtqa súırep shyǵarǵan. Munyń bári - dáleldemeler jıyntyǵy. Sotqa deıin, sot tergeýinde sottalýshynyń kinási tolyq dáleldendi dep esepteıdi, - dedi sýdıa.

Eske salsaq, Aqtóbe oblystyq qylmystyq ister jónindegi mamandandyrylǵan aýdanaralyq sotynda 25 jastaǵy sottalýshyǵa úkim oqyldy. Onyń kámelet jasqa tolmaǵan qyzǵa seksýaldyq zorlyq kórsetkeni dáleldendi.