Ájesiniń 100 myń teńgesin jumsap jibergen boıjetken qylmysyn jasyrý úshin fantastıkalyq oqıǵa oılastyrǵan

PAVLODAR. KAZINFORM – Ájesiniń 100 myń teńgesin jumsap qoıǵan qyz is-áreketin jasyrý úshin ózin tonap ketkendigi týraly oqıǵany oılap tapqan. Bul týraly Polisia.kz jazdy. 

20 jastaǵy pavlodarlyq qyz polıtsııaǵa qońyraý shalyp, ózin tonap ketkeni týraly habarlady. Operatordyń suraqtaryna jylap turyp jaýap bergen ol, oqıǵany sheberlikpen sýrettep, shynaıy obrazǵa engen. 

– Meniń sómkemdi urlap ketti! Іshinde 100 500 teńge jáne kók tústi Samsung telefony bolǵan. Avtobýstan túsip jatqanymda, artymnan bir er adam kelip, sómkemdi julyp alyp qashyp ketti. Men onyń artynan júgirdim, biraq qýyp jete almadym. Ol birden joq bolyp ketti, – degen telefonnyń ar jaǵynan óksigin basa almaǵan «jábirlenýshi».

Jedel-tergeý toby dereý oqıǵa ornyna attanyp, qyz kórsetken mekenjaıǵa jetti. Polıtsııa qyzmetkerleri, avtopatrýlder men ýchaskelik ınspektorlar jaqyn mańdaǵy kóshelerdi tekserip, kúdiktige uqsas azamattardy izdestirdi. Beınebaqylaý kameralary tekserildi, biraq oqıǵa kameraǵa túspegen. Qyzdyń buryn er adamdy aýlada kórgenin aıtyp, artynan júgirgenin baıandaǵan málimdemeleri kúdik týdyrdy.

Tergeýshige kúmán týdyrǵan taǵy bir jaıt – qyzdyń qylmyskerdiń qashqan baǵytyn naqty aıta almaı, birese bir jaqty, birese ekinshi jaqty kórsetkeni. Jábirlenýshi polıtsııa bólimine jetkizilgen soń, kúdik rastaldy. Tergeý kezinde qyz aıǵaqtarynan shatasa bastady, artynsha shydamy taýsylyp, shyndyqty aıtyp berdi. Belgili bolǵandaı, stýdentke ájesi nesıe qaryzyn tóleý úshin 100 myń teńge bergen eken. Alaıda qyz bul aqshany óz qajetine jumsap jiberip, jaqyndary ursady dep qorqyp, tonaý oqıǵasyn oılap tapqan.

«Arnaıy qyzmetterdi kórineý jalǵan shaqyrǵany úshin» qyz ákimshilik jaýapkershilikke tartylyp, 30 aılyq eseptik kórsetkish (AEK) kóleminde aıyppul salyndy.

Pavlodar oblysy polıtsııa departamentiniń baspasóz qyzmeti bul jaǵdaıdyń mańyzdylyǵyn atap ótti: «Mundaı áreketter tek polıtsııa jumysyna kedergi keltirip qana qoımaı, shynaıy qaýip-qater týyndaǵan kezde qyzmet kórsetý ýaqytyn uzartyp, basqa azamattardyń ómirine qaýip tóndirýi múmkin. Jedel qyzmetter men polıtsııa naqty qaýipterge qoljetimdi bolýy tıis.» 

Quqyq qorǵaý organdarynyń basty ustanymy – «Zań jáne tártip». Bul qaǵıda azamattardyń qaýipsizdigin qamtamasyz etý jáne qoǵamdyq tártipti saqtaý jolyndaǵy negizgi mindet bolyp qala beredi. Ár quqyq buzýshy óz áreketi úshin mindetti túrde jaýap beredi.

Eske sala keteıik, buǵan deıin Pavlodar polıtseıleri balalaryna 4,5 mln teńge qaryz ákeni ustaǵanyn jazǵan bolatynbyz.