Ájesi jańa týǵan nemeresin peshke jaǵyp jibergen - SQO
Osydan birneshe jyl buryn kúıeýimen ajyrasqan Olesıa Grýdınskaıa ulyn ertip áke-sheshesiniń úıine kóship kelgen. Buryn da azdap araqqa qumar anasy - Lıýbaǵa otaǵasy qaıtys bolǵaly qoı deıtin jan bolmapty. Biraq ishken kúnniń ózinde kempir eshkimniń mazasyn almaıdy eken.
Olesıa Grýdınskaıa 19 qazanda qyz bosanǵan. Araǵa úsh kún salyp úıine kelgenimen, shaqalaqtyń qyzýy kóterilip, olar qaıtadan aýrýhanaǵa túsken. Ájesi nemereme dári egetin boldy dep ýaıymdaǵan da kórinedi. Alaıda oqıǵa bolǵan kúni nege ekeni belgisiz, ol qyzy men úlken nemeresin nanǵa jumsap, ózi sumdyq qylmysqa barǵan.
«Ol peshtiń ústindegi plıtany alyp tastap, janyp jatqan otqa sábıdi qoıǵan. Balany sheshindirip tastapty. Olesıa úıge kelgende, qyzyn tappaı qalǵan. Peshten kúıgen ettiń ıisin sezgende, ystyq plıtany qolymen alyp tastap, shaqalaqty alyp shyqqan. Men onyń kúıik shalǵan qoldaryn kórdim»- deıdi Dýbrovnoe aýylynyń turǵyny Marııa Morozova.
Alpysty alqymdaǵan Lıýbov Rýsalıevanyń mundaı áreketke ne ıtermelegenin qazir tergeýshiler anyqtap jatyr. Aýyl ákiminiń aıtýynsha, otbasy aqshadan tarlyq kórmegen, turmystary da túzý.
Dýbrovnoe aýyldyq okrýginiń ákimi Galına Shvetsovanyń aıtýynsha, bular turmysy nashar otbasy retinde esepte turmaǵan. Ájesi zeınetker. «Azdap ishetini bolmasa, Lıýbov Rýsalıevanyń eshkimge zııany joq edi. Kórshilerimen tatý bolatyn. Oqıaǵanyń aq-qarasyn tergeýshiler anyqtar. Eger bizdiń tarapymyzdan kómek kerek bolsa, árıne, qol ushyn berýge daıynbyz», -deıdi aýyl ákimi.
Mert bolǵan shaqalaqtyń denesi áli máıithanada jatyr. Aldaǵy kúnderi jerlenetin oǵan anasy áli týý týraly kýálik te alyp úlgermepti. Tek Valentına dep at qoıǵan.
Qazir kúdikti ýaqytsha ustaý abaqtysyna qamalyp, tergeý júrip jatyr.