«Ájemniń baýyrsaqtary», palaý kórmesi - Qostanaıdaǵy naýryz toıy

QOSTANAI. QazAqparat - Qostanaıda Naýryz meıramyna arnalǵan is-sharalar jospary jarııalandy, dep habarlaıdy QazAqparat qala ákimdiginiń baspasóz qyzmetine silteme jasap.

Ulystyń uly kúnine arnalǵan sharalar Qostanaı qalasynyń ortalyq alańynda 22 naýryzda bastalady. Jyldaǵy dástúr boıynsha, kıiz úıler qaz-qatar qurylady. Úzdik bezendirý baıqaýyna kásiporyndar, kásipkerler men oqý oryndary qatysady. Olar aq úı ishinde merekelik dastarhan jaıady. Sondaı-aq, qalada teatrlandyrylǵan qoıylymdar, horlar sherýi jáne merekelik kontsert Naýryzdyń kórigin qyzdyrmaq.

Saǵat 10:00-de «Shyǵys - uqypty is» etnografııalyq festıvali men «Palaý - dastarhan qazynasy» kórmesi bastalady. Osy ýaqytta «Ájemniń tátti baýyrsaqtary» atty kelinder baıqaýy qatar ótedi.

Tús áletinde «Naýryzbek-Naýryzgúl!» atty qalanyń jas ártisteriniń qatysýymen kóktemgi esimder merekesi uıymdastyrylady. Qalalyq balalar shyǵarmashylyǵy mektebi ujymynyń kontserti 12:30-da bastalady.

Buǵan qosa, Qostanaıdyń dámhanalary men meıramhanalarynyń aspazdary arasynda aspazdar saıysyn ótkizý josparlanǵan. Qolóner sheberlerine de óz týyndylaryn synap kórýge múmkindik beriledi. Barlyq saıystyń úzdikteri syılyqtarmen, alǵys hattarmen marapattalady.

Merekelik shara «Armandastar» vokaldyq stýdııasy jáne «Aq darıǵa» qazaq ánderi horynyń kontsertimen aıaqtalady.