Ájeler elordalyq avtobýsta «Qamajaı» ánin oryndap berdi
ASTANA. QazAqparat - Astana qalasynyń turǵyndarynyń biri qoǵamdyq kólikte «Qamajaı» ánin shyrqaǵan ájelerdi vıdeoǵa túsirip aldy, dep habarlaıdy «QazAqparat» HAA tilshisi.
Áleýmettik jelige tarap ketken vıdeo birshama qaralyp, kópshiliktiń oń pikirine ıe bolyp jatyr. Rasynda da, ándi tyńdap kórseńiz, ájelerdiń vokaldyq turǵyda kásibıligi baryn ańǵarýǵa bolady. «Astana LRT» baspasóz qyzmeti de bul boljamdy rastap otyr.
«Bul ájeler Pavlodar oblysynan kelgen ansambl músheleri. Olar ózderi Naýryz meıramy qarsańynda Astanaǵa kontsert qoıýǵa kelgenin aıtty. Ájeler «Jastar saraıy» aıaldamasynan otyryp, Kúıshi Dına aıaldamasyna deıin jolaýshylardyń kóńilin kóterýmen boldy. Án shyrqap, ázil aıtqan ájelerge jolaýshylar da qosylyp ketti. Olar - zeınetkerler, arasynda múmkindigi shekteýli jandar da bar», - dep habarlady «Astana LRT» uıymynyń baspasóz hatshysy Naýat Azanbaeva.
