Ájeler baıqaýy: 80 jastaǵy aqmolalyq «Asyl áje» ataǵyna ıe boldy
KÓKShETAÝ. QazAqparat – Aqmola oblysynda Naýryz merekesi qarsańynda «Aq jaýlyqty aq áje» baıqaý-festıvali ótip, úzdik ájeler anyqtaldy, dep habarlaıdy QazAqparat tilshisi.
Baıqaýdy Aqmola oblystyq halyq shyǵarmashylyq jáne mádenı demalys ortalyǵy halqymyzdyń salt-dástúri men ádet-ǵurpyn dáripteýge arnalǵan «Dástúr men ǵuryp» arnaıy jobasynyń tujyrymdamasy sheńberinde uıymdastyrdy. Oǵan óńirdegi qalalyq, aýdandyq mádenıet úıleriniń joldamasymen jasy 60-tan asqan nemere, shóbere tárbıelep otyrǵan ájeler qatysyp, baq synady.
Baıqaý tórt kezeńnen turdy, ony ishinde «Qyzym saǵan aıtam...» jáne tanystyrý kezeńinde ájeler umytylyp bara jatqan, sırek qoldanylatyn kóne sózderdiń maǵynasyn ashyp, túsindirdi. Sondaı-aq, ulttyq taǵam túrlerin ázirleýden saıysty. «Ónerpaz áje» kezeńinde «Besik jyry» jáne ózge de umyt bolyp bara jatqan eski ánderdi oryndap, ulttyq bı bıledi. Al «Barmaqtary maıysqan» kezeńde ózderiniń qoldarynan shyqqan buıymdardan kórme uıymdastyrdy.
Aq jaýlyqty ájelerdiń ónerine QR eńbek sińirgen ártisi, Kókshetaý qalasynyń qurmetti azamaty, dástúrli ánshi, qazylar alqasynyń tóraıymy Bısara Mákenova, Stepnogor qalalyq ardagerler jáne analar keńesiniń tóraıymy Farıda Esjanova, respýblıkalyq «Jigit sultany» baıqaýynyń jeńimpazy, «QR Táýelsizdigine 30 jyl» medaliniń ıegeri, oblystyq halyq shyǵarmashylyq jáne mádenı demalys ortalyǵynyń bólim basshysy Asylbek Ábenov tárizdi qazylar baǵa berdi.
«Búgingi ótkizip otyrǵan baıqaýymyzdyń basty maqsaty, otbasylyq qundylyqtarǵa negizdelgen dástúrli tárbıeni nasıhattaý, ultymyzdyń qasıetti qazynasy salt-dástúrlerdi, ádet-ǵuryptardy mura etý, áje tárbıesin óskeleń urpaqqa ónege, úlgi etý, ájelerge laıyqty qoldaý kórsetý jáne kópshilikke nasıhattaý», - dep atap ótti Aqmola oblystyq mádenıet basqarmasynyń basshysy Aıgúl Sábıtova.
Baıqaý qorytyndysy boıynsha Tselınograd aýdanynan Túımeqyz Ryspaeva «Sheber áje» atalymy, Arshaly aýdanynan Shyryngúl Uzaqbaeva «Ónegeli áje» atalymy, Býrabaı aýdanynan Zeltaı Túgelbaeva «Meıirban áje» atalymy, Shortandy aýdanynan Jupar Júsipova «Dana áje» atalymy, Birjan sal aýdanynan Baqyt Jeksenova «Parasatty áje» atalymy, Býrabaı aýdanynan Bahyt Elemanova «Ulaǵatty áje» atalymy, Aqkól aýdanynan Gúlsara Qumarbek «Baısaldy áje» atalymy, Qorǵaljyn aýdanynan Toqtar Eleýova «Bilgir áje» atalymy, Atbasar aýdanynan Roza Táshimova «Kórikti áje» atalymy, Jarqaıyń aýdanynan Raısa Mótenova «Meıirimdi áje» atalymy, Stepnogor qalasynan Baǵıla Muratova «Ánshi áje» atalymy boıynsha júldeger atandy. Al bas júlde «Asyl áje» ataǵyna Astrahan aýdanynan kelgen 80 jastaǵy Sholpan Qasymova laıyq dep tanyldy.
Baıqaý qatysýshylary men júldegerleri baǵaly syılyqtarmen jáne dıplodarmen marapattaldy.
