Ajar Ǵınııat óziniń jeke málimetteri petıtsııa kezinde zańsyz paıdalanylǵanyn aıtty
Osyǵan deıin buqaralyq aqparat quraldarynda Densaýlyq saqtaý mınıstri A.Ǵınııat burynǵy vıtse-mınıstr Ábishevke qatysty polıtsııaǵa aryz túsirgeni habarlanǵan edi.
«Men oǵan qatysty (O. Ábishevke) aryz túsirgen joqpyn. Bireýler kelisimimdi almaı, jeke derekterimdi paıdalana otyryp, meniń atymnan petıtsııaǵa qatysqan. Osy oraıda meniń jeke derekterim zańsyz paıdalanylǵan. Sondyqtan memlekettik organnyń basshysy ekenimdi, sondaı-aq meniń kez-kelgen málimdemem bizdiń mınıstrliktiń ustanymy retinde qabyldanatynyn eskere otyryp, atalǵan áreketti kim jasaǵanyn anyqtaý maqsatynda aryz jazdym. Atap aıtqanda, jeke derekterimdi paıdalana otyryp, osyndaı is-qımyldar qandaı maqsatta jasalǵanyn anyqtaý kerek», - dedi A. Ǵınııat Senattyń jalpy otyrysynan keıin tilshiler suraǵyna jaýap bere otyryp.
Atalǵan petıtsııa burynǵy densaýlyq saqtaý mınıstri Eljan Birtanov pen onyń orynbasary Oljas Ábishevti qoldaý maqsatynda uıymdastyrylǵan bolatyn.
Budan buryn habarlanǵandaı, burynǵy densaýlyq saqtaý vıtse-mınıstri Oljas Ábishev 2020 jyly 2 tamyzda qamaýǵa alyndy.
Oǵan memlekettik bıýdjet qarajatyn jymqyrdy degen aıyp taǵyldy.
Odan bólek, sol jyly 3 qarashada burynǵy Densaýlyq saqtaý mınıstri Eljan Birtanov ta bıýdjet qarajatyn ysyrap etti degen kúdikpen tutqyndalǵan bolatyn.
2022 jylǵy 28 qazanda Astana qalasy Saryarqa aýdanynyń №2 sotynda burynǵy Densaýlyq saqtaý mınıstri Eljan Birtanov pen onyń orynbasary Oljas Ábishevtiń isine qatysty sot úkimi shyqty.
