Ajar Ǵınııat: Medtehnıkalalardy satyp alý ortalyqtandyrylady
«Memleket basshysy «SQ-Farmatsııa» arqyly búkil medıtsınalyq tehnıkany ortalyqtandyryp satyp alýǵa kóshýdi tapsyrdy. Densaýlyq saqtaý mınıstrligi byltyr barlyq tehnıka boıynsha túgendeý júrgizdi. Onyń qorytyndysy boıynsha densaýlyq saqtaý uıymdarynyń jaraqtandyrylý deńgeıi 83 paıyzdy qurady. Medıtsınalyq tehnıkanyń tozýy 49,6 paıyz deńgeıinde boldy. Qazirgi ýaqytta osy júıeniń negizgi problemalyq máseleleri mynalar: jaraqtandyrýdyń jetkiliksizdigi jáne qolda bar medıtsınalyq tehnıka parkiniń tozý deńgeıiniń joǵary bolýy; jergilikti jerlerde medıtsınalyq tehnıkany satyp alý kezinde baǵany joǵary ustaýy; densaýlyq saqtaý uıymdary úshin qoljetimdi medıtsınalyq tehnıka lızıngi tetikteriniń bolmaýy; otandyq medıtsınalyq tehnıkany jasaýdyń damý deńgeıiniń tómendigi», - dedi mınıstr.
Ajar Ǵınııattyń aıtýynsha, osyǵan baılanysty atalǵan problemalardy sheshý úshin «SQ-Farmatsııa» JShS bazasynda medıtsınalyq tehnıkany satyp alýdy eki kezeńde ortalyqtandyrý júzege asyrý josparlanǵan. Bul rette 1-kezeńde 2022 jylǵy naýryzǵa deıin jergilikti atqarýshy organdardan usynystar men ótinimder jınaý, medıtsınalyq tehnıkany satyp alýdy uıymdastyrý men ótkizýdi retteıtin normatıvtik quqyqtyq aktilerge ózgerister engizý, sáýir aıynyń sońyna deıin satyp alýǵa tehnıkalyq erekshelikterdi birizdendirý, ashyqtyqty qamtamasyz etý maqsatynda Qarjy mınıstrliginiń elektrondyq qarjy ortalyǵynyń alańyndaǵy aqparattyq júıeler men ótinimderdi jınaýdy avtomattandyrý pysyqtalady. Sonymen qatar mamyrdan bastap elektrondyq satyp alýdy ótkizý jáne 2025 jylǵa deıin medıtsınalyq tehnıkaǵa qajettilikti taldaýdy aıaqtaý josparlanǵan. Odan keıin qarjylandyrý kózderin aıqyndaı otyryp, 2025 jylǵa deıin basym baǵyttar boıynsha Medıtsınalyq tehnıkamen jaraqtandyrý baǵdarlamasy bekitiletin bolady.
«Al 2-shi kezeńde otandyq jáne sheteldik medıtsınalyq tehnıkany óndirýshilerimen óndiristi oqshaýlaý máselelerin pysyqtaý jónindegi is-sharalardy iske asyrý, uzaq merzimdi sharttardyń tetikterin ázirleý, satyp alý praktıkasyna ómirlik mańyzdy tsıkldy jáne keshendi túrde jaraqtandyrý úshin jańa jobalardyń «Daıyn kúıde» basym baǵyttary boıynsha medıtsına tehnıkasyn satyp alý kelisimsharttary tetikterin engizý josparlanýda», - dedi ol.
Mınıstrdiń atap ótýinshe, atalǵan is-sharalar josparlaý men satyp alýdyń ashyqtyǵyn qamtamasyz etýge, qajetti medıtsınalyq jabdyqtarmen jaraqtaný deńgeıin arttyrýǵa, satyp alýdy shoǵyrlandyrý jáne tehnıkalyq tapsyrmalardy birizdendirýdiń esebinen satyp alynatyn medıtsınalyq tehnıkanyń qunyn tómendetýge, servıstik qyzmet kórsetý men kadrlardy oqytý sapasyn arttyrýǵa, QR medıtsınalyq tehnıka naryǵynda otandyq taýar óndirýshisiniń úlesin arttyrýǵa múmkindik beredi.
