Ajar Ǵınııat MÁMS qoryn mınıstrlikten bólýge qatysty pikir bildirdi

NUR-SULTAN. QazAqparat – QR Densaýlyq saqtaý mınıstri Ajar Ǵınııat 2020 jyly qurylǵan Mindetti áleýmettik medıtsınalyq saqtandyrý qoryn mınıstrlik quramynan shyǵaryp, bólek uıym retinde qyzmet etýine qatysty túsinik berdi, dep habarlaıdy QazAqparat tilshisi.

«Búginde 3 mln adam MÁMS (mindetti áleýmettik medıtsınalyq saqtandyrý) júıesinde tirkelmegen, ıaǵnı saqtandyrylmaǵan. Biraq bul ol adamdar medıtsınalyq kómeksiz qalady degen sóz emes. Ol adamdardyń turaqty jumysy joq nemese áleýmettik turǵydan qorǵaýdaǵy adamdar. Sondyqtan olar júıede tirkelmegen», - dedi Ajar Ǵınııat tilshilerdiń suraǵyna jaýap bere turyp.

Odan bólek, mınıstr MÁMS qoryn densaýlyq saqtaý mınıstrliginen shyǵaryp, bólek uıym retinde qurýǵa qatysty oıyn ortaǵa saldy.

«Qor onsyz da bólek uıym retinde jumys istep jatyr. Qazir qor qalyptasý ústinde. Sońǵy ýaqytta MÁMS júıesi aıasynda kórsetiletin medıtsınalyq kómekterge qatysty suraqtar kóp. Osyǵan oraı búgin jınaqtalǵan máselelerdi qaraý úshin bas qosyp otyrmyz. Sondyqtan MÁMS qoryn mınıstrlikten bólek uıym retinde qurýdyń qajettiligi joq dep oılaımyn», - deıdi ol.

Búgin elordada mindetti áleýmettik medıtsınalyq saqtandyrý júıesi qyzmetine arnalǵan dóńgelek ústel ótti.

Atalǵan sharada mınıstr elimizde adam óliminiń 2021 jylmen salystyrǵanda 5 paıyz azaıǵanyn málimdedi.

Sondaı-aq, vedomstvo basshysy MÁMS júıesinde saqtandyrylmaǵan qazaqstandyqtarǵa 12 aılyq jarna tólenetini týraly aıtty.