Ajar Ǵınııat qyzylsha aýrýynyń taralýyna qatysty pikir bildirdi

ASTANA. QazAqparat – Densaýlyq saqtaý mınıstri Ajar Ǵınııat elimizde balalar arasynda qyzylsha aýrýynyń taralýyna qatysty pikir bildirdi, dep habarlaıdy QazAqparat.

«Qazirgi kezde balalar arasynda qyzylsha aýrýy tarap jatyr. Infektsııa aýa arqyly taraıtyny belgili. Aýrýdy juqtyrýdyń alǵashqy derekteri shetelden kelgender men týrısterden anyqtaldy, ıaǵnı Túrkııadan, Reseıden, Mysyrdan kelgen adamdardan baıqaldy. Osynyń saldarynan balalar aýrýdy juqtyra bastady. Kóbine ekpe almaǵan balalar aýyrdy, olarda aýrýǵa qarsy ımmýnıtet bolmaǵan», - dedi A. Ǵınııat.

Osy oraıda ol qazir qyzylshaǵa qarsy ekpe almaǵan balalardy vaktsınalaý júrip jatqanyn aıtty.

Sonymen qatar mınıstr mektepterde karantın talaptaryn engizý qarastyrylmaǵanyn aıtty. Qyzylsha aýrýyna qatysty qatań shekteý engizýdiń reti joq.

Budan buryn habarlanǵandaı, qazaqstandyqtarǵa qyzylsha dertin juqtyrý qaýpi bar ekeni eskertildi.