Ajar Ǵınııat koronavırýstan qaıtys bolǵandar sanynyń artý sebebin túsindirdi

NUR-SULTAN. QazAqparat – Osy aıda koronavırýspen aýrýhanaǵa túskender sany 2,5 esege artyp ketti. Bul týraly QR Densaýlyq saqtaý vıtse-mınıstri Ajar Ǵınııat aıtty, dep habarlaıdy QazAqparat tilshisi.

«Búgingi tańda qaıtys bolǵan adamdar sanynyń ósýi aýrýshańdyqtyń beleý alýyna, aýrýhanaǵa túsip jatqan naýqastardyń artýyna baılanysty. Ótken aımen salystyrǵannyń ózinde aýrýhanaǵa túsken naýqastardyń sany 2,5 esege artyp otyr. Ótken aıda 4 myńǵa jýyq adam em alsa, qazir 10,5 myń adam arýhanaǵa tústi. Aýrýhana túsken adamdardyń 600-den astamy qatań túrde jansaqtaý bóliminde jatyr. Osy qatań túrde nemese aýrýdy asqyndyryp alyp, aýrýhanaǵa túsken adamdardyń kóbi úıinde óz betinshe emdelgen. Dárigerdiń emes ózge adamdardyń keńesimen emdelgender de bar», - dedi Ajar Ǵınııat Ortalyq kommýnıkatsııalar qyzmetindegi brıfıng barysynda.

Onyń atap ótýinshe, osyǵan baılanysty elimizdiń barlyq óńirinde mobıldik brıgadalar jumys isteıdi.

«Ýchaskelik dárigerińizge habarlasyp, mobıldik brıgada shaqyrsańyz der kezinde dári-dármek ákeledi. Test alyp, úıde ne aýrýhanada em alýyńyzdy anyqtaıdy. Sondyqtan ýaqyt ótkizip almaýyńyzdy, óz betinshe emdelmeýińizdi suraımyz», - dedi ol.