Ajar Ǵınııat koronavırýs ınfektsııasynyń aldyn alýǵa qatysty usynys berdi
«Koronavırýs ınfektsııasynyń aldyn alý jáne emdeý boıynsha praktıkalyq usynystar bergim keledi. Birinshiden, bul - koronavırýs ınfektsııasynyń aldyn alýdyń sanıtarııalyq-epıdemııaǵa qarsy sharalaryn saqtaý. Salamatty ómir saltyn ustaný, kóbinese taza aýada bolý, kúndelikti, sonyń ishinde tynys alý jattyǵýlaryn jasaý óte mańyzdy», - dedi vıtse-mınıstr Ortalyq kommýnıkatsııalar qyzmetindegi baspasóz máslıhaty barysynda.
Onyń aıtýynsha, ekinshiden, joǵarǵy tynys alý joldarynyń jiti respıratorlyq ınfektsııa sımptomdary baıqalǵan kezde óz betimen emdelýmen aınalysýǵa bolmaıdy. Beıne nemese aýdıodybys boıynsha konsýltatsııa bere alatyn jáne koronavırýs ınfektsııasyna kúdik bolǵan kezde emhanadan mobıldik brıgadany jibere alatyn ýchaskelik dárigerge júginý kerek.
«Úshinshiden, eger naýqasta joǵary temperatýra, aıqyn álsizdik, entigý paıda bolsa, qurǵaq jótel bolsa, ol nemese onyń týystary jedel járdemge – «103» nómirine qońyraý shalýy kerek. Statsıonarlyq emdeýge kórsetilimder bolǵan kezde ınfektsııalyq statsıonarǵa emdeýge jatqyzýdan bas tartpańyz. Qorytyndylaı kele, koronavırýsty jeńý úshin, ózimizdiń densaýlyǵymyz úshin durys tańdaý jasaýǵa nazaryńyzdy aýdarǵym keledi», - dedi Ajar Ǵınııat.