Ajar Ǵınııat qyzylsha órshigen óńirlerdi atady

Elimizde qyzylsha aýrýy boıynsha epıdemıologııalyq jaǵdaı turaqsyz. Bul týraly Densaýlyq saqtaý mınıstri Ajar Ǵınııat málim etti, dep habarlaıdy Kazinform.

«Qyzylshamen syrqattanýshylyqtyń ósýi baıqaldy. Búgingi tańda qyzylsha aýrýy boıynsha epıdemıologııalyq jaǵdaı turaqsyz. Respýblıkada qyzylshanyń 17 myńnan astam jaǵdaıy tirkelgen, 82 paıyzdan astamy balalarǵa tıesili. Onyń ishinde, 83 paıyzy – ekpe almaǵan balalar. Bul rette, balalardyń 60 paıyzy bas tartýǵa baılanysty, qalǵan balalar egý jasyna jetpeýine baılanysty jáne medıtsınalyq kórsetilimder boıynsha vaktsınatsııa almaǵan. Qyzylsha aýrýy barlyq óńirde tirkeldi», - dedi mınıstr Ortalyq kommýnıkatsııalar qyzmetindegi brıfıngte. 

Onyń dereginshe, qyzylsha Shymkent, Almaty qalalarynda, Jambyl, Almaty, Mańǵystaý, Aqtóbe, Qyzylorda jáne Atyraý oblystarynda órship tur.

«Syrqattanýshylyqtyń kúrt ósýi osy jyldyń qyrkúıeginen bastap uıymdasqan ujymdarda, ıaǵnı oqý jylynda balalardyń jınalýyna baılanysty baıqalady. Nátıjesinde syrqattanýshylyq deńgeıi eki ese ósti. Búgingi tańda elimizde qyzylshamen aýyrǵan naýqastar úshin ınfektsııalyq aýrýhanalarda 3,5 myńnan astam tósek-oryn ashyldy. Statsıonarlyq emdelýde 2 375 bala jatyr. Tósek-orynmen qamtý 59,5 paıyzdy quraıdy. Rezervte 1 myńnan astam oryn bar», - dedi Ajar Ǵınııat.