Ajar Ǵınııat Qaraǵandydaǵy ýlanǵan balalarǵa bardy

ASTANA. QazAqparat – Densaýlyq saqtaý mınıstri Ajar Ǵınııat Qaraǵandyǵa jumys sapary barysynda oblystyq klınıkalyq aýrýhananyń ınfektsııalyq ortalyǵyna baryp, zardap shekken balalarǵa medıtsınalyq kómek barysymen tanysty, dep habarlaıdy QazAqparat mınıstrliktiń baspasóz qyzmetine silteme jasap.

«Qaraǵandy oblysynyń arnaýly áleýmettik qyzmet kórsetý ortalyǵynan túsken 14 balanyń 5-i búginde em alýda. Balalarda oń dınamıka baıqalady, esteri anyq, erte ońalyp keledi», - dep jazylǵan mınıstrlik habarlamasynda.

Óz sózinde mınıstr jas patsıentterdiń densaýlyǵy jaqsaryp kele jatqanyn aıtty. Balalardy emdeý tásilin respýblıkalyq mamandar únemi baqylaıdy.

Densaýlyq saqtaý mınıstrligi zardap shekken balalardyń jaǵdaıyna jáne olarǵa medıtsınalyq kómek kórsetýge turaqty monıtorıng júrgizedi.

Eske salsaq, 30 shildede Qaraǵandy oblysynyń balalarǵa arnaýly áleýmettik qyzmet kórsetý ortalyǵynda birneshe bala ýlanyp, onyń bireýi qaıtys boldy.

Altaýy jansaqtaý bólimine jetkizildi.

Tamyz aıynyń basynda tergeý aıaqtalǵanǵa deıin ortalyq dırektorynyń mindetin atqarýshy jáne osy ortalyqtyń 12 medıtsına qyzmetkeri jumystan shettetildi.

Keıinnen balalar tamaqtan ýlanbaǵan bolyp shyqty.

28 tamyzda ýlanǵan balalardyń taǵy bireýi aýrýhanada kóz jumdy.