Ajar Ǵınııat elimizdegi dári-dármek qoryna qatysty túsinik berdi

NUR-SULTAN. QazAqparat – Qazaqstanda aýmaǵynda naýqastarǵa kerek dári-dármek jetkilikti. Bul týraly Úkimet otyrysynda koronavırýstyń taralýyna jol bermeý taqyrybyn talqylaý kezinde Densaýlyq saqtaý mınıstri Ajar Ǵınııat aıtty, dep habarlaıdy QazAqparat tilshisi.

«Naýqastarǵa kerek dári-dármek jetkilikti. Aýrýhanalarda dári-dármektiń 16 ataýy boıynsha eki aılyq qory qamtamasyz etildi. Al emhanalar men ambýlatorııalarda 1,3 mlrd teńgeden astam somaǵa dári satyp alynyp, qor jasaqtaldy. Bul óz kezeginde 80 myń patsıentke jetkilikti», - dedi A. Ǵınııat.

Onyń aıtýynsha, qosymsha biryńǵaı dıstrıbıýtor qoımalaryna 4 mlrd teńgege dári-dármek alyndy.

«Mınıstrlik dári-dármek, vaktsınamen qamtamasyz etýdi turaqty baqylaýynda ustap otyr»,- dedi vedomstvo basshysy.

Budan buryn habarlanǵandaı, «qyzyl» aımaqta shekteý sharalary densaýlyq saqtaý júıesiniń júktemesine baılanysty eki kezeńmen qabyldanady.

Úkimet basshysy Álıhan Smaılov ákimdikterge halyqty vaktsınatsııalaý jáne revaktsınatsııalaý jumystaryn jandandyrýdy tapsyrdy.