Ajar Ǵınııat: Eldegi epıdemıologııalyq ahýal qanaǵattanarlyq deńgeıde

NUR-SULTAN. QazAqparat – QR Densaýlyq saqtaý mınıstri Ajar Ǵınııat eldegi epıdemıologııalyq ahýaldy qanaǵattanarlyq deńgeıde dep baǵalady, dep habarlaıdy QazAqparat tilshisi.

«Koronavıýrs ınfektsııasynyń taraý qarqyny báseńdegenin kórip otyrsyzdar. Táýligine 10-15 jaǵdaı ǵana tirkelip otyr. Sonyń ózinde táýligine 15 myń PTR-synama zerttelip jatyr. Osynyń 10-15-i ǵana vırýstyń bar ekenin kórsetýde. Bul qazirgi tańda epıdemıologııalyq jaǵdaı qanaǵattanarlyq deńgeıde ekenin rastap tur. Búginde shynymen de indetti taraýy saıabyrsı bastady. Osyǵan baılanysty barlyq derlik shekteý sharalaryn alyp tastaǵanymyzdy bilesizder. Sonda da adamdar kóp jınalatyn jerlerde maska taǵýǵa keńes beremiz», - dedi mınıstr Úkimet otyrysynan keıin BAQ ókilderine bergen suhbatynda.

Onyń aıtýynsha, álemde epıdemıologııalyq jaǵdaı áli qalypqa túse qoımaǵan.

«Qazir Qytaıda «omıkronmen» naýqastaný kólemi artyp jatqanyn bilesizder. Birqatar Eýropa elderinde syrqattaný deńgeıi ósip otyr. Sondyqtan eldegi jaǵdaı turaqty bolǵanyna qaramastan, shekara mańaıynda shekteýler sol kúıinde qalyp otyr. PTR-test qorytyndysynsyz, vaktsınatsııa pasportynsyz tek óz azamattarymyz ǵana emes, sheteldikter de el aýmaǵyna kire almaıdy», - dedi vedomstvo basshysy.