Ajar Ǵınııat densaýlyq saqtaý júıesinde qyzmetin jalǵastyra ma
ASTANA. KAZINFORM – QR Densaýlyq saqtaý mınıstri Aqmaral Álnazarova osyǵan deıin vedomstvony basqarǵan Ajar Ǵınııatpen bolǵan kezdesýi jaıynda aıtyp berdi.
«Ajar Ǵınııatqyzymen kezdestim. Biz áriptespiz, birazdan beri birge jumys istep kelemiz. Ár kezeńde túrli vedomstvo basshysyna júkteletin ózindik mindetter bolady. Ajar Ǵınııatqyzy eldegi koronavırýs indeti jappaı taralǵan kezinde qyzmetke kelip, onyń barlyq jumysy jedel basqarýǵa baǵyttaldy. Sonymen qatar, qazir biz vaktsınamen basqarylatyn ınfektsııalardy kórip otyrmyz. 2023 jyly Dúnıejúzilik densaýlyq saqtaý uıymymen birge jumys isteýge erekshe nazar aýdaryldy. Sondyqtan biz onyń tájirıbesin mindetti túrde qoldanamyz», - dedi A. Álnazarova Senatta tilshiler suraǵyna jaýap bere otyryp.
Ol Densaýlyq saqtaý mınıstrliginiń burynǵy basshysy Ajar Ǵınııattyń osy júıede qalýy múmkin degen pikirin bildirdi.
Sondaı-aq jýrnalıster mınıstrden «A. Ǵınııat jumysqa qatysty qandaı da bir keńes berdi me» dep surady.
«Biraz naqty keńester aıtyldy... Negizi, jumys barysynda apparattaǵy jaǵdaıdy kóresizder. Eger qandaı da bir suraqtaryńyz bolsa, jaýap berýge kez kelgen ýaqytta daıynmyn. Barlyq usynys eskeriledi. Ajar Ǵınııatqyzy ózine júktelgen mindetterdi laıyqty oryndady», - dedi Densaýlyq saqtaý mınıstri.
