Ajar Ǵınııat Atyraýdaǵy Teńiz ken ornynda sanıtarlyq talaptardy kúsheıtýdi tapsyrdy
Óńirlik kommýnıkatsııalar qyzmetiniń málimetinshe, Densaýlyq saqtaý mınıstri onlaın formatta ótken koronavırýs ınfektsııasyna qarsy respýblıkalyq shtab otyrysyn Atyraý oblysyndaǵy epıdemıologııalyq ahýal qaralǵan.
Oǵan Atyraý oblysy ákiminiń orynbasary Qaırat Nurlybaev, oblystyq sanıtarııalyq-epıdemıologııalyq baqylaý departamentiniń basshysy Mádenıet Tanaýov, oblystyq densaýlyq saqtaý basqarmasynyń basshysy Ashan Baıdýálıev, emhanalary men aýrýhana basshylary qatysty.
Oblystyq densaýlyq saqtaý basqarmasynyń basshysy Ashan Baıdýálıevtyń málimetinshe, óńir 11 qańtarda «qyzyl» aımaqqa ótken. Sońǵy aptada koronavırýs ınfektsııasyn juqtyrý 29%-ǵa óskeni baıqalady.
«Ortasha eseppen táýligine 500-den astam naýqas tirkelip otyr. Іndetke shaldyǵýshylar sanynyń artýyna baılanysty 13 qańtarda rezervten qosymsha 1 780 ınfektsııalyq tósek-oryn ashyldy. Qazir ınfektsııalyq tósek-orynnyń sany 2 360-ty quraıdy. Al, jansaqtaý bóliminde 106 oryn bar. Infektsııalyq statsıonarda 801 naýqas emdelip jatyr. Mundaǵy júkteme – 33,9%. Jansaqtaý bólimindegi júkteme 11,3%-dy qurap otyr», -deıdi Ashan Baıdýálıev.
Onyń aıtýynsha, ótken jyldan beri medıtsınalyq mekemelerdiń materıaldyq-tehnıkalyq bazasy nyǵaıtylǵan. Qazir bul mekemelerde jeke qorǵanys quraldary men dárilik zattardyń 2 aılyq qory bar. Dárilik zattardyń 42 ataýy boıynsha turaqtandyrý qory qalyptasqan.
«Qazir ambýlatorlyq baqylaýda 3 443 adam bar. Sońǵy aptada naýqastardyń sany 45 ese kóbeıdi. Úı jaǵdaıynda em qabyldap jatqan naýqastardy 129 mobıldi brıgada baqylaıdy. Onyń ishinde Atyraý qalasynda 54, aýdandarda 75 mobıldi brıgada bar. Rezervtik mobıldi brıgada sany – 50. Sondaı-aq, sońǵy aptada jedel medıtsınalyq járdemdi shaqyrtý 3,9%-ǵa tómendegeni baıqalady», -dep málimetti Ashan Baıdýálıev.
Basqarma basshysy atap ótkendeı, vaktsınalardyń І komponentin 262 250 adam saldyrǵan. Bul – óńir turǵyndarynyń 71%-y. Vaktsınalardyń ІІ komponentin 245 198 (66%) adam ektirgen. Sondaı-aq, 16 560 atyraýlyq revaktsınatsııadan ótken. Revaktsınatsııa alatyndarǵa Verocell, QazVak, Komirnati ekpeleri salynyp jatyr.
Densaýlyq saqtaý mınıstri Ajar Ǵınııattyń óńirdegi epıdemıologııalyq ahýalǵa alańdaýshylyǵyn bildirip, birqatar tapsyrma berdi. Ásirese, koronavırýs ınfektsııasyn juqtyrý qaýpi joǵary Teńiz ken ornynda sanıtarııalyq talaptardy kúsheıtý, turǵyndar arasynda vaktsına alý men revaktsınatsııa jóninde túsinik jumysyn jandandyrý, tapshy mamandardy oqytý máselesi oń sheshilýi qajet.
Eske sala ketelik, buǵan deıin Teńiz ken ornynda 456 adam koronavırýspen aýyryp jatqanyn, keıin Atyraý oblysynda koronavırýs juqtyrǵan 2 naýqastyń qaıtys bolǵanyn habarlaǵan edik.
